ÉVORA, PORTUGAL, 18 Agostu 2026 – Igreja Katólika iha Portugal ofisialmente entrega restus mortais Preladu Katólika na’in-tolu, Dom Jaime Garcia Goulart, Dom José Joaquim Ribeiro no Monseñor Martinho da Costa Lopes, ba Governu no Igreja Katólika Timor-Leste, iha serimónia ne’ebé hala’o iha Sé Katedral Évora.
Serimónia entrega restus mortais ne’e hala’o liu hosi Misa Eukaristia Ação de Graças, ne’ebé prezide hosi Nunsiu Apostóliku ba Portugal, Dom Andrés Carrascosa Coso, hamutuk ho Bispu Dioseze Baucau, Dom Leandro Maria Alves, bispu sira hosi Portugal no padre sira seluk.
Misa ne’e realiza hodi fó agradesimentu ba knaar, servisu no legadu espirituál Preladu Katólika na’in-tolu, molok restus mortais sira kontinua viajen fila ba Timor-Leste, rai ne’ebé sira servisu no dedika sira-nia moris ba povu no Igreja.
“Regresu ba uma”
Nunsiu Apostóliku ba Portugal, Dom Andrés Carrascosa Coso, dehan katak regresu restus mortais Preladu na’in-tolu ba Timor-Leste la’ós de’it transladasaun, maibé mak “regresu ba uma”, ba Igreja no povu ne’ebé sira servisu durante sira-nia moris.
“Regresu restus mortais Preladu na’in-tolu ne’e la’ós de’it transladasaun, maibé hanesan regresu ba uma, ba Igreja no povu ne’ebé sira serve iha sira-nia moris,” nia hateten.
Dom Andrés Carrascosa salienta katak Preladu na’in-tolu agora fila ba Igreja Timor-Leste, ne’ebé sira ajuda hari’i, hametin no dezenvolve durante sira-nia ministériu.
Tuir Nunsiu Apostóliku, memória no legadu Preladu na’in-tolu tenke transforma sai responsabilidade ba jerasaun sira ohin loron no futuru, atu kontinua kaer knaar no misaun Igreja iha Timor-Leste.
Nia mós rekoñese kontribuisaun boot Preladu na’in-tolu iha haforsa fiar Katólika no vida Igreja iha Timor-Leste.
Dom Jaime Garcia Goulart hala’o knaar importante iha Dioseze Dili, enkuantu Dom José Joaquim Ribeiro fó kontribuisaun boot ba fortalesimentu vida pastorál. Monseñor Martinho da Costa Lopes, iha sorin seluk, hala’o ministériu iha períodu ida ne’ebé difísil iha istória Timor-Leste, liuliu durante tempu okupasaun Indonézia.
Igreja iha luta no sofrimentu povu
Nunsiu Apostóliku mós hateten katak durante prosesu luta ba independénsia no períodu sofrimentu povu Timor-Leste, Igreja Katólika sai fatin ba orasaun no konsolasaun, no mós sai institusaun ne’ebé defende no proteje dignidade umana povu.
Igreja, tuir nia, kontinua fó esperansa ba povu atu bele enfrenta sofrimentu, kontinua moris no la lakon esperansa.
Dom Andrés Carrascosa hateten katak Timor-Leste agora hetan ona independénsia no presiza kontinua hametin páz, estabilidade no seguransa.
Tuir nia, rekonsiliasaun la’ós signifika haluha memória, maibé mak prosesu atu purifika memória iha luz Evanjellu, hodi bele haree ba futuru ho esperansa no responsabilidade.
Governu Timor-Leste fó agradesimentu
Iha serimónia ne’ebá, Ministru Planeamentu no Investimentu Estratéjiku, Gastão Francisco de Sousa, nu’udár membru Komisaun Organizadora no reprezentante Governu Timor-Leste, hato’o agradesimentu ba Igreja Katólika iha Portugal tanba fó oportunidade ba Governu Timor-Leste atu hola parte iha selebrasaun Misa Eukaristia Ação de Graças.
Nia hateten katak selebrasaun ne’e importante nu’udár forma ida hodi fó memória no rekoñesimentu ba Preladu Katólika na’in-tolu, ne’ebé iha kontribuisaun boot ba istória povu no Estadu Timor-Leste.
Agradesimentu ba Igreja Katólika Portugal
Enkuantu ne’e, Bispu Dioseze Baucau, Dom Leandro Maria Alves, hato’o agradesimentu ba Igreja Katólika no komunidade sarani iha Portugal, ne’ebé dezde uluk kontinua fó apoiu ba povu Timor-Leste.
Nia destaca liuliu kontribuisaun Igreja Katólika Portugal iha formasaun rekursu umanu no hametin fiar Katólika iha Timor-Leste.
Dom Leandro mós dehan katak Governu Timor-Leste no Igreja Katólika sei lori urna ho restus mortais Preladu Katólika na’in-tolu fila ba Timor-Leste.
Regresu restus mortais sira ne’e konsidera nu’udár momentu istóriku ba Igreja no povu Timor-Leste, tanba fó oportunidade ba jerasaun ohin loron atu lembra fali servisu, sakrifísiu no legadu espirituál Preladu na’in-tolu iha prosesu evangelizasaun no dezenvolvimentu Igreja Katólika iha rai Timor.
Restus mortais Dom Jaime Garcia Goulart, Dom José Joaquim Ribeiro no Monseñor Martinho da Costa Lopes sei kontinua viajen ba Timor-Leste, atu hetan urna sira-nia hela-fatin final iha rai ne’ebé sira dedika sira-nia moris ba nia povu no Igreja.
#Media MPIE#
Dokumentasaun kompletu iha Page: https://www.facebook.com/share/p/188zQerhSg/