MALIANA, 13 Novembru 2026 – Ministru Planeamentu no Investimentu Estratéjiku (MPIE), S.E. Eng. Gastão Francisco de Sousa, ohin partisipa iha programa Meet the Press, ne’ebé organiza husi Sekretaria Estadu Komunikasaun Sosiál (SEKOMS), iha Salaun Maria Tapo, Maliana Vila, Postu Administrativu Maliana, Munisípiu Bobonaro.

Programa ne’e sai hanesan plataforma komunikasaun direta entre Governu, jornalista sira no komunidade, atu hato’o informasaun kona-ba progresu investimentu infraestrutura nasionál, inklui implementasaun projetu estratéjiku Governu nian no responde ba pergunta husi mídia.

Ezekusaun Fundu Infraestrutura Atinje 72,7%

Iha ninia intervensaun, Ministru Gastão Francisco de Sousa informa katak ezekusaun Fundu Infraestrutura ba períodu 2023–2026, to’o fulan Novembru 2026, atinje ona 72,7%, ho montante ezekutadu besik US$750 millaun, husi orsamentu totál US$1.031 millaun.

Ministru subliña katak investimentu infraestrutura la’ós de’it atu suporta dezenvolvimentu kapitál nasionál, maibé mós atu promove dezenvolvimentu ekonómiku no sosial iha munisípiu sira, liuhusi konstrusaun no reabilitasaun estrada, ponte, sistema saneamentu no eletrisidade.

“Investimentu infraestrutura importante atu lori dezenvolvimentu ba munisípiu sira no kria oportunidade ekonómika ba komunidade,” dehan Ministru Gastão iha Salaun Maria Tapo, Maliana Vila.

Estrada Maliana–Batugade Sai Prioridade ba Munisípiu Bobonaro

Iha kontestu dezenvolvimentu infraestrutura iha Munisípiu Bobonaro, Ministru mós destaca projetu estrada ligasaun Maliana–Batugade nu’udar infraestrutura importante ida ne’ebé sei kontribui ba hadi’a konektividade, fasilita movimentu ema no merkadoria, no hametin atividade ekonómika komunidade lokál.

Nia esplika katak estrada ne’e iha importánsia estratéjika tanba sei liga Munisípiu Bobonaro ho área fronteira no korredor ekonómiku norte, hodi loke asesu ba oportunidade negósiu no merkadu ba agrikultór, komersiante no emprezáriu lokál sira.

Liuhusi infraestrutura ne’e, Governu hakarak fasilita transporte no movimentu produtu lokál, nune’e bele kontribui ba kresimentu ekonómiku no melloramentu kondisaun moris komunidade sira iha rejiaun ne’e.

Konstrusaun Sentru Konvensaun Internasionál (ICC) Hein Aprovasaun OJE 2027

Kona-ba projetu infraestrutura estratéjiku seluk, Ministru Gastão informa katak konstrusaun Sentru Konvensaun Internasionál (ICC) iha Dili sei hein aprovasaun Orsamentu Jerál Estadu (OJE) 2027, molok hahú prosesu implementasaun konstrusaun fízika.

Governu iha ona alokasaun indikativa iha Fundu Infraestrutura ho montante besik US$291 millaun ba projetu ne’e. Maibé, Ministru esplika katak responsabilidade prinsipál ba koordenasaun implementasaun projetu ne’e iha Ministériu Koordenadór Asuntu Ekonómiku (MKAE), enkuantu prosesu fiskalizasaun no aprovizionamentu envolve Ajénsia Dezenvolvimentu Nasionál (ADN) no Komisaun Nasionál Aprovizionamentu (CNA), tuir respetivu kompeténsia.

“MPIE kontinua iha koordenasaun ho MKAE. Ba projetu ne’e, iha ona alokasaun iha Fundu Infraestrutura ho valór besik US$291 millaun. Maibé, prosesu kontratu sei hala’o depoisde OJE 2027 hetan aprovasaun. Montante finál ba projetu ne’e sei determina tuir prosesu kontratu. Ba konstrusaun fízika, presiza aprovasaun OJE 2027,” esplika Ministru Gastão de Sousa durante programa Meet the Press iha Maliana.

Ministru mós haktuir katak ICC iha importánsia estratéjika ba preparasaun Timor-Leste atu asume Prezidénsia ASEAN iha tinan 2029. Infraestrutura ne’e sei suporta nesesidade atu simu enkontru, konferénsia no eventu internasionál sira, hanesan mós Primeiru-Ministru Kay Rala Xanana Gusmão temi durante debate jerál kona-ba OJE 2027, iha loron 10 Novembru 2026.

Programa Meet the Press ne’e reprezenta kompromisu Governu nian atu kontinua promove transparénsia, prestasaun kontas no asesu ba informasaun públika, hodi garante katak komunidade no mídia hetan informasaun direta kona-ba progresu programa no projetu dezenvolvimentu nasionál.

Media MPIE 

Dokumentasaun ba foto sira asesu iha: https://www.facebook.com/share/p/1EBUpAckD6/ 

Share / Partilhar / Fahe :