Coimbra, Portugal, 27 Outubru 2026 – Ministru Planeamentu no Investimentu Estratéjiku, Eng. Gastão Francisco de Sousa, halo vizita institusionál ba Faculdade de Direito da Universidade de Coimbra, Portugal, ho objetivu atu hametin relasaun istórika no esplora oportunidade kooperasaun foun entre instituisaun akademika ne’e no Timor-Leste.
Vizita ne’e akompaña mós husi Dra. Lúcia Lobato, Koordenadora Grupu Traballu ba Reforma da Justiça Timor-Leste. Delegasaun simu iha Sala do Conselho Científico husi Doutora Margarida Costa Andrade no Doutor João Pedro Rodrigues.
Enkontru ne’e iha objetivu atu hametin ligasaun institusionál no identifika área sira ne’ebé bele dezenvolve kooperasaun iha futuru, liuliu iha domíniu edukasaun jurídika, dezenvolvimentu kapasidade institusionál no Reforma da Justiça iha Timor-Leste.
Tuir komunikadu husi Faculdade de Direito da Universidade de Coimbra, vizita ne’e la’ós de’it enkontru servisu ida, maibé mós reprezenta reenkontru entre instituisaun ho istória no ligasaun kulturál ne’ebé kleur ona.
“Entre Faculdade ida ne’ebé, kuaze sékulu rua, forma jurista sira atu serve bem comum, no nasaun ida ne’ebé halo lian Portugés no Direitu nu’udar parte ida husi ninia identidade,” afirma Faculdade iha ninia komunikadu.
Relasaun Istórika no Kooperasaun Durante Dékadas
Relasaun entre Faculdade de Direito da Universidade de Coimbra no Timor-Leste iha istória naruk. Durante dékadas, Universidade de Coimbra simu estudante Timoroan barak ne’ebé hetan formasaun akademika iha instituisaun ne’e no fila fali ba Timor-Leste atu kontribui ba harii no hametin instituisaun nasionál.
Antre graduadu sira ne’e, iha profisionál barak ne’ebé ohin loron hala’o knaar importante iha setór justisa no iha instituisaun públika sira iha Timor-Leste. Ligasaun akademika no kulturál ne’e sai parte importante husi relasaun entre Timor-Leste no Portugal.
Hafoin enkontru, delegasaun hala’o vizita ba instalasaun Faculdade, inklui espasu istóriku sira ne’ebé rai memória kona-ba jerasaun estudante no mestre sira. Vizita remata iha Sala da Direção, ne’ebé parte rua reafirma vontade atu kontinua hametin relasaun no dezenvolve inisiativa kooperasaun iha futuru.
Faculdade de Direito da Universidade de Coimbra hato’o agradese ba vizita institusionál ne’e no reafirma ninia disponibilidade atu kontinua kolabora ho Timor-Leste, liuliu iha área sira ne’ebé koñesimentu jurídiku no formasaun akademika bele kontribui ba harii nasaun ne’ebé justu, forte no demokrátiku.
Vizita ne’e reprezenta oportunidade importante atu haforsa kooperasaun entre Timor-Leste no instituisaun akademika internasionál, liuliu iha apoiu ba dezenvolvimentu rekursu umanu, reforma institusionál no hametin Estadu Direitu iha Timor-Leste.
Media MPIE
Dokumentasaun ba Foto kompletu bele hare iha: https://www.facebook.com/share/p/19qQSdHMAS/