Baucau, 10 Janeiru 2026
Sua Exelénsia Ministru Planeamentu no Investimentu Estratéjiku (MPIE), Eng. Gastão Francisco de Sousa, partisipa iha serimónia inagurasaun rehabilitasaun estrada husi area Cairavela ba Caisidu to’o Aeroportu Baucau, ne’ebé inagura ofisialmente husi Sua Exelénsia Primeiru-Ministru RDTL, Kay Rala Xanana Gusmão.
Iha diskursu iha okaziaun ne’e, S.E. Ministru Eng. Gastão Francisco de Sousa hateten katak estrada refere hahu planeamentu iha tempu V Governu Konstituisionál no kontinua implementasaun iha VI Governu, ho orientasaun MPIE iha tinan 2015, ne’ebé na’in planeamentu na’in husi Primeiru-Ministru atuál, Kay Rala Xanana Gusmão.
“Projetu estrada pakote rua ida ne’e paradu tiha durante tempu balu, maibé iha tinan 2025 ita hahu fila-fali implementa nia faze finál, no ohin loron ita bele inagura estrada ho kilómetru 8,” hateten Ministru.
S.E. Ministru MPIE mos alerta ba autoridade munisipál no komunidade lokal atu kuidadu didiak infraestrutura estrada ne’e, tanba investimentu ida ne’e sei fó benefísiu boot ba Munisípiu Baucau no mos ba munisípiu sira seluk iha parte leste Timor-Leste.
Projetu rehabilitasaun estrada ne’e aprova ho orsamentu total USD 6 milliaun, finansiadu hosi MPIE liuhusi Konsellu Administrasaun Fundu Infrastrutura (KAFI), ho verifikasaun, fiskalizasaun no supervizaun tomak hosi Ajénsia Dezenvolvimentu Nasionál (ADN, IP), ho kolaborasaun hosi Autoridade Munisipál Baucau.
Implementasaun projetu ne’e responsabiliza hosi Kompañia JOVA Construction, ho durasaun tempu tinan ida, ne’ebé hahu hosi area Cairavela, liu suku Caisidu no remata iha Aeroportu Baucau.
Projetu rehabilitasaun estrada ida ne’e hahú ho lansamentu fatuk dahuluk iha loron 11 Janeiru 2025, hosi S.E. Ministru MPIE, Eng. Gastão Francisco de Sousa, ho omologasaun hosi S.E. Primeiru-Ministru RDTL, Kay Rala Xanana Gusmão.
Iha oportunidade ne’e, Prezidente Autoridade Munisipál Baucau, Dra. Veneranda E. M. Lemos Martins, hatoo agradese ba IX Governu Konstituisionál, liuhusi MPIE, ne’ebé kontinua no remata obra ida ne’e hodi fó asesu di’ak liután ba komunidade sira.
“Ami hatoo boasvinda nafatin ba Governu Sentral no husu atu tau matan liu-liu tan ba estrada urbana sira ne’ebé durante ne’e komunidade hotu hein,” hateten nia.
S.E. Primeiru-Ministru RDTL, Kay Rala Xanana Gusmão, iha nia intervençaun, husu ba autoridade lokal sira atu servisu hamutuk ho juventude, hodi tau matan ba manutensaun estrada no infraestrutura sira ne’ebé iha, atu labele estraga no bele uza ba tempu naruk.
Remata