DGOT Timor-Leste no DGT Portugal asina Memorandu Entendimentu atu hametin kooperasaun iha ordenamentu territóriu, informasaun jeoespasiál no jeodezia
LISBOA, 20 Agostu 2026 — Direção-Geral de Ordenamento do Território (DGOT) Timor-Leste no Direção-Geral do Território (DGT) Portugal asina, ohin iha Lisboa, Memorandu Entendimentu ida hodi hametin kooperasaun institusionál iha área ordenamentu territóriu, informasaun jeoespasiál no jeodezia.
Memorandu ne’e asina husi Diretor-Geral de Ordenamento do Território Timor-Leste, Roger Tertuliano de F. B. Belo, no Diretora-Geral do Território Portugal, Fernanda Maria Rosa do Carmo Julião.
Serimónia asinatura ne’e hala’o ho prezensa Ministro Planeamentu no Investimentu Estratéjiku Timor-Leste, Gastão Francisco de Sousa, no Sekretáriu Estadu Administrasaun Lokál no Ordenamentu Territóriu Portugal, Silvério Regalado.
Kuadru foun ba koperasaun institusionál
Memorandu Entendimentu ne’e estabelese kuadru koperasaun ida entre DGOT Timor-Leste no DGT Portugal, ne’ebé sei permite dezenvolve inisiativa no atividade konjunta sira, inklui fahe koñesimentu no prátika di’ak, asisténsia téknika, formasaun, interkâmbiu tékniku no espesiálita sira, no programa estájiu.
Koperasaun ne’e sei fó atensaun liuliu ba hadi’a lejizlasaun iha área ordenamentu territóriu, planeamentu territoriál, informasaun jeoespasiál no jeodezia, no mós ba hametin kapasidade téknika no institusionál DGOT Timor-Leste nian.
Área koperasaun sira ne’ebé previstu inklui fahe esperiénsia Portugal nian iha elaborasaun, implementasaun, monitorizasaun no avaliasaun ba lejizlasaun, programa no planu territoriál; dezenvolve solusaun ba produsaun no jestaun informasaun jeoespasiál; monitoriza okupasaun no utilizasaun rai; hametin infraestrutura jeodézika; no fó formasaun espesiálizada ba tékniku Timor-oan sira.
Apoiu ba Sistema Nasionál Ordenamentu Territóriu
Parseria ne’e hakarak kontribui ba konsolidasaun Sistema Nasionál Ordenamentu Territóriu Timor-Leste, ne’ebé agora iha ona kuadru legál rasik, Planu Nasionál Ordenamentu Territóriu, planu munisipál dahuluk sira ne’ebé aprova ona, planu munisipál no urbanu foun sira ne’ebé hela dezenvolve, no estrutura nasionál ida dedicada ba informasaun jeoespasiál.
Durante serimónia, Ministro Planeamentu no Investimentu Estratéjiku Timor-Leste subliña importánsia atu aproveita esperiénsia ne’ebé DGT Portugal halibur ona, adapta prátika di’ak sira ba realidade Timor-oan, no kria oportunidade ba tékniku sira hosi instituisaun rua atu bele servisu hamutuk.
Portugal hatudu empenhu ba koperasaun
Iha sorin seluk, Sekretáriu Estadu Administrasaun Lokál no Ordenamentu Territóriu Portugal hatudu nia interese no empenhu atu dezenvolve hamutuk ho Timor-Leste programa koperasaun ida ne’ebé efetivu iha área sira previstu iha Memorandu Entendimentu.
Koperasaun ne’e sei aproveita esperiénsia no koñesimentu DGT Portugal nian, no mós instituisaun Portugál sira seluk, atu apoia Timor-Leste iha dezenvolvimentu kapasidade no sistema sira iha área ordenamentu territóriu.
Asinatura Memorandu Entendimentu ne’e reprezenta pasu foun ida iha koperasaun institusionál entre Timor-Leste no Portugal, no kria baze ba dezenvolvimentu asaun konkretu sira ne’ebé bele kontribui ba hametin kapasidade nasionál iha planeamentu no jestaun sustentável territóriu.
#Media-MPIE#
Dokumentasaun kompletu klik iha link : https://www.facebook.com/share/p/1LQnLmJu4k/