Díli, 10 Jullu 2026 – Ekipa téknika hosi Unidade Planeamentu Integradu (UPI), Ministériu Planeamentu no Investimentu Estratéjiku (MPIE), halo surumutuk ho Ministru Agio Pereira hodi prepara reuniaun interministeriál kona-ba elaborasaun Planu Médiu Prazu (PMP) 2027–2030 ba setór Kuadru Institusionál.
Reuniaun interministeriál ne’e sei hala’o iha ámbitu Komisaun Interministeriál ba Koordenasaun Dezenvolvimentu Institusionál, ne’ebé estabelese tuir Rezolusaun Governu n.º 43/2024, loron 14 fulan-agostu. Komisaun ne’e prezide hosi Ministru Agio Pereira, hamutuk ho Ministru Planeamentu no Investimentu Estratéjiku.
Durante reuniaun preparatóriu ne’e, partisipante sira analiza progresu serbisu ne’ebé Unidade Planeamentu Integradu no Prezidénsia Konsellu Ministrus hala’o ona iha koordenasaun ho ekipas téknikas hosi ministériu sira ne’ebé integra iha setór Kuadru Institusionál. Reuniaun ne’e mós diskute ajenda ba enkontru interministeriál, atu harmoniza kontributu hosi entidade relevante sira no define orientasaun estratéjika ba Planu Médiu Prazu 2027–2030.
Preparasaun Planu Médiu Prazu ne’e kontinua rezultadu hosi Relatóriu Monitorizasaun ba Progresu Planu Estratéjiku Dezenvolvimentu (PED) 2011–2030, ne’ebé aprezenta ba Konsellu Ministrus iha loron 4 fulan-marsu 2026. Planu ne’e sei orienta etapa ikus implementasaun PED, liuhosi determinasaun prioridade governu nian ba períodu 2027 to’o 2030.
UPI lidera koordenasaun téknika ba preparasaun planu ne’e, ho envolvimentu hosi entidade governamentál oioin. Ba setór Kuadru Institusionál, prosesu ne’e lidera hosi Ministru Agio Pereira iha koordenasaun ho Ministériu Interiór, Ministériu Administrasaun Estatál, Ministériu Finansas, Ministériu Justisa, Ministériu Defeza, Ministériu Negósius Estranjeirus no Kooperasaun, no Komisaun Funsaun Públika.
Tuir Relatóriu Monitorizasaun PED 2011–2030, husi meta 199 ne’ebé distribui iha setór estratéjiku lima, setór Kuadru Institusionál iha meta 44. Husi total ne’e, 6 meta konklui ona, 27 meta hatudu progresu avansadu, no 11 meta hatudu progresu parsiál, ho laiha meta ida ne’ebé laiha progresu.
Reuniaun interministeriál ne’e sei sai etapa importante ida hodi asegura katak prioridade estratéjika ba setór Kuadru Institusionál reflete nesesidade dezenvolvimentu institusionál Timor-Leste nian no suporta implementasaun efetiva PED to’o tinan 2030.
=======
Klik iha link ne’e
https://timor-leste.gov.tl/?p=50440&n=1&lang=tp