DÍLI, 25 Maiu 2026 – Governu Timor-Leste hamutuk ho parseiru dezenvolvimentu internasionál hala’o surumutuk; (TLDPM) 2026 durante loron rua, hahu iha 25 to’o 26 Maiu 2026, ho fokus ba fortalecimentu ekonomia azul, integrasaun ASEAN, reforma administrasaun públika no avaliasaun dezenvolvimentu nasionál ba tinan 2030.
Enkontru ne’ebé realiza iha Aula Ministériu Finansas, Díli, lori tema “Harii Horizonte Resistente: Ekonomia Azul, Integrasaun ASEAN no Asaun Koordenadu”, atu hametin koordinasaun dezenvolvimentu entre Governu no parseiru internasionál sira.
Ministra Finansas Timor-Leste, Santina J.R.F. Viegas Cardoso, loke oficialmente fórum refere antes kontinua ho diskursu prinsipal hosi Primeiru-Ministru Timor-Leste, Kay Rala Xanana Gusmão.
Iha sesaun plenária, Governu aprezenta prioridade nasionál balu, inklui polítika no planu asaun atu promove ekonomia azul ne’ebé forte no sustentável iha Timor-Leste.
Koordenadór Prinsipál Unidade Ekonomia Azul iha Gabinete Primeiru-Ministru, Inês Araújo Gonçalves, sei aprezenta polítika promosaun ekonomia azul ne’ebé konsidera iha poténsia boot atu hametin reziliénsia ekonomia nasionál liuhosi utilizasaun sustentável rekursu tasi nian.
Aleinde ne’e, Koordenadór Unidade Planeamentu Integradu Ministério Planeamentu no Investimentu Estratéjiku, Epi Orleães, sei aprezenta relatóriu monitorizasaun progresu implementasaun Strategic Development Plan (SDP) 2011–2030 no diresaun dezenvolvimentu nasionál ba futuru.
Prosessu integrasaun Timor-Leste ba ASEAN mos sai hanesan tópiku prinsipál ida iha fórum refere liuhosi aprezentasaun hosi Vise-Ministra Assuntu ASEAN, Milena Rangel.
Enkuantu ne’e, Prezidenti Komisaun Funsaun Públika, Agostinho Letencio de Deus, mos aprezenta matéria kona-ba reforma administrasaun públika hanesan parte ida hosi esforsu atu hametin governasaun no jestaun estadu.
Iha loron dahuluk, fórum kontinua ho sesaun koordinasaun interministeriál ne’ebé diskute setór dezenvolvimentu institusionál no dezenvolvimentu ekonomia. Sesaun dezenvolvimentu institusionál lidera hosi Ministru Gabinete Konsellu Ministrus, Agio Pereira, enkuantu setór dezenvolvimentu ekonomia lidera hosi Vise-Primeiru Ministru no Ministru Koordenadór ba Asuntu Ekonomia no Ministru Turizmu no Ambiente, Francisco Kalbuadi Lay.
Tama ba programa loron daruak, diskusaun sei fó fokus ba setór infraestrutura no dezenvolvimentu kapitál sosiál ne’ebé lidera hosi Ministru Planeamentu no Investimentu Estratéjiku, Gastão Francisco de Sousa, no mos Vise-Primeiru Ministru no Ministru Koordenadór ba Asuntu Sosiál no Ministru Dezenvolvimentu Rural no Habita Komunitária, Mariano Assanami Sabino.
Enkontru TLDPM 2026 ne’e sei taka oficialmente hosi Ministru Negósius Estranjeirus no Kooperasaun Timor-Leste, Bendito dos Santos Freitas.