Díli, 29 Janeiru 2026 – Asian Development Bank (ADB), iha kolaborasaun ho Governu Timor-Leste, organiza Consultation Workshop on Climate Adaptation Investment Planning (CAIP) iha Hotel Timor, Díli, ho objetivu atu hadia planeamentu no finansiamentu investimentu adaptasaun ba mudansa klima iha rai-laran.
Workshop ida ne’e parte husi Assisténsia Téknika Rejionál ADB TA 10098-REG, ne’ebé foka atu aumenta kapasidade institusionál nasaun sira membru, inklui Timor-Leste, hodi identifika, prioritiza no mobiliza osan ba investimentu adaptasaun klima ho abordagem programátiku.
Atividade ida ne’e envolve reprezentante hosi Ministériu Planeamentu no Investimentu Estratéjiku (MPIE), Ministériu Finansas (MOF), Ministériu Turismo no Ambiente (MTE), seitor privadu, no mos parseiru dezenvolvimentu sira ne’ebé servisu iha área reziliénsia klima. Workshop halo revisaun ba estratéjia nasionál, planu sektoriál, no iniciativa adaptasaun ne’ebé seidauk remata.
ADB mos aprezenta abordajen CAIP, prosesu Climate Risk Assessment (CRA), no tipu investimentu adaptasaun ne’ebé bele dezenvolve iha nivel munisípiu ka bacia fluvial. Partisipante sira konvida atu fó input no feedback hodi hili área jeográfika prioritáriu ba implementasaun programa asisténsia téknika ida ne’e no etapa tuir mai.
Segundo ADB, planeamentu investimentu adaptasaun klima konsidera importante tebes ba Timor-Leste, tanba risku mudansa klima ne’ebé kontinua aumenta ba setor bee, rai, no rekursu naturál sira seluk. Workshop ida ne’e espera bele fó base forte ba kolaborasaun intersetoriál no dezenvolvimentu politika reziliénsia klima iha futuru.
ADB hato’o agradesementu ba Governu Timor-Leste ba partisipasaun ativa iha workshop ida ne’e, no reafirma nia kompromisu atu kontinua apoia esforsu nasionál hodi hari ekonomía inkluzivu, sustentável, no reziliente ba mudansa klima.
