Ermera, 26 Janeiru 2026 – GOVERNU LANSA FATUK DAHULUK BA KONSTRUSAUN ESTRADA URBANA GLENO NO LIGASAUN GLENO–LETEFOHO.
IX Governu Konstitusional, liuhosi Ministériu Obras Públikas (MOP), ofisialmente hala’o serimónia lansamentu fatuk dahuluk ba projetu Konstrusaun Estrada Urbana iha Gleno, inklui ligasaun estrada husi Gleno ba Letefoho.
Serimónia ne’e hetan mos partisipasaun ativu husi membru Governu, membru Parlamentu, autoridade Igreja Katólika, autoridade munisipál, autoridade postu administrativu, autoridade lokál, ADN, KAK, CNA no populasaun tomak ho intensaun katak “Osan Povu Nian, Jere ho Di’ak, hodi akompaña prosessu assinatura kontratu no lansamentu projetu to’o remata, nuudar faze inisiu hosi implementasaun re-konstrui estrada iha Ermera.
Lansamentu fatuk dahuluk realiza iha Aldeia Lihumo, Suku Estado, Postu Administrativu Ermera, ne’ebé lansa direta husi Sua Exelénsia Primeiru-Ministru, Kay Rala Xanana Gusmão, ho akompaña husi membru Governu, Membru Parlamentu Nasional, Autoridade Munisipál, Administrador Postu, Xefe Suku, Xefe Aldeia, lia-na’in kultural no komunidade lokal sira. Serimónia ne’e mós hetan seguransa husi F-FDTL no PNTL.
Lansamentu fatuk dahuluk ba Konstrusaun Estrada Urbana Gleno no ligasaun Gleno–Letefoho, marka pasu importante ida ba dezenvolvimentu Munisípiu Ermera. Projetu ne’e la’ós de’it simbolu politiku, maibé mós resposta ba nesesidade real komunidade nian atu hetan asesu estrada di’ak no seguru.
Hafoin serimónia lansamentu, Ministru Obras Públikas assina mós kontratu ho kompaña sira ne’ebé mak sai vensedór ba projetu konstrusaun estrada refere.
Iha intervensaun PAM Ermera, Sr. José Martinho dos Santos Soares, hato’o agradese ba Governu sentrál no parte hotu ne’ebé ho esforsu maka’as realiza lansamentu estrada iha loron ne’e, ho objetivu hodi hadia asesu no promove dezenvolvimentu iha Munisípiu Ermera.
Primeiru-Ministru Kay Rala Xanana Gusmão hateten katak lansamentu fatuk dahuluk ne’e nu’udar parte husi komitmentu Governu ba povu, ho prinsípiu “esperansa la bosok”, tanba infraestrutura mak sai nu’udar baze ba dezenvolvimentu nasional, inklui estrada, bee, eletrisidade no infraestrutura seluk. PM mós husu atu MOP tau atensaun ba estrada liga ba área Aiseo tanba nia valor istóriku iha tempu rezisténsia.
Projetu Estrada Gleno–Letefoho sei ezekuta husi Kompaña CCECC ho orsamentu total US$ 38,800,054.00, enkuantu Projetu Estrada Urbana Gleno sei responsabiliza husi Kompaña Shabryca Construction Unip. Lda.