S.E. Ministru Planeamentu no Investimentu Estratéjiku, Eng. Gastão Francisco de Sousa; S.E. Ministra Finansas, Sra. Santina J. Rodrigues F. Viegas Cardozo; no mos S.E. Ministru Administrasaun Estatal, Sr. Tomás do Rosário Cabral, hamutuk ho Prezidente Komisaun Funsaun Públika (KFP), Sr. Agustinho Letêncio de Deus, nomeadu hanesan Ekipa Avaliadór ba área Boa Governasaun.
Iha reuniaun ida-ne’e, S.E. Primeiru-Ministru, Kay Rala Xanana Gusmão, akompaña direta hodi fó instrusaun ba Ekipa Avaliadór ne’ebé halo avaliasaun kona-ba kondisaun mínimu instituisaun públika sira iha Rejiaun Administrativa Espesiál Oecusse Ambeno (RAEOA), liu-liu iha área Boa Governasaun, ne’ebé hala’o iha edifísiu Programa Nasionál Dezenvolvimentu Suku (PNDS).
Ekipa Avaliadór halo avaliasaun hahú hosi loron 19 to’o loron 22 fulan Janeiru tinan 2025, no envolve diretamentu Prezidente Autoridade RAEOA, Sr. Régio da Cruz Salu; Koordenadór Zona Ekonómika Espesiál Dezenvolvimentu Oecusse Ambeno (ZEEDOA), Sr. Erkulanu de Sousa; funsionáriu públiku tomak, inklui autoridade lokál hosi suku 20.
Avaliasaun ida-ne’e foku ba aspetu tolu mak Rekursu Umanu no Finansas, Infraestrutura, no Boa Governasaun, ho objetivu atu hatene no avalia delegasaun kompeténsia ba servisu kada instituisaun iha RAEOA.