Ermera, 02 Dezembru 2025 — Ministru Planeamentu no Investimentu Estratéjiku (MPIE), Eng. Gastão Francisco de Sousa, halo abertura ofisiál ba Projeto Plano de Uso do Solo Urbano de Gleno (PUSO Gleno) iha Munisípiu Ermera. Seremónia ida ne’e mak partisipa husi PAM Ermera, reprezentantes husi Ministériu Estatal, Ministériu Obras Públicas, no komandu PNTL Munisípiu Ermera.
Iha nia mensajen abertura, Ministru Gastão sublinha katak dezenvolvimentu sidade labele depende de’it ba planu, mapa ka investimentu, maibé tenki hahu husi ema, ho partisipasaun ativa husi komunidade, família no suku sira.
“Planeamentu urbanu la’os prosesu tékniku de’it. Nia ezije vizaun kolektivu no partisipasaun povu. Ida ne’e mak fundamentál ba futuru Timor-Leste,” hatete Ministru.
Nia espika katak MPIE sei kontinua konsolida abordajen foun, inkluzivu no transparente ba planeamentu urbanu, hodi garante katak planu sira responde ba realidade lokal, respeita kultura, no atende nesesidade komunidade.
Ministru apela forte ba komunidade atu toma parte iha prosesu konsulta públika:
“Favor ita hotu envolve iha konsulta, fó hanoin no hato’o ita nia preokupasaun. Ita nia konhesimentu lokal mak fo direksaun ba desizaun ne’ebé di’ak.”
Ministru hatán fali, sublinhando katak kualker planu sei la iha impaktu boot se komunidade la partisipa. Tanba ne’e, MPIE sei kontinua servisu ho rigor tékniku, kooperasaun internasional no responsabilidade estratéjika, maibé sempre prioriza servisu hamutuk ho povu, lian mos komunidade Ermera oan sira.
Iha nia remate, Ministru afirma katak ho kooperasaun no partisipasaun kolektivu, Gleno bele transforma sai kapital urbanu ida ne’ebé fó oportunidade, dignidade no reziliénsia, no reflete identidade povu Ermera nian.