Bobonaro, 13 Outubru 2025 — Sua Excelência Ministru Planeamentu no Investimentu Estratejiku (MPIE), Eng. Gastão Francisco de Sousa, akompanha husi Sekretáriu Estadu Dezenvolvimentu Lokál (SEDL), Mateus W. dos Santos Tallo, ne’ebé reprezenta Ministério dos Assuntos Estatais (MAE), hamutuk ho Prezidente Autoridade Munisípiu Bobonaro, Paulo Moniz, hala’o serimónia lansamentu ofisiál ba Plano de Uso do Solo (PUSO) sidade Maliana. Serimónia ofisiál ne’e hala’o iha Salaun Maria Tapo, Munisípiu Bobonaro.
Plano de Uso do Solo (PUSO) sidade Maliana iha importánsia estratéjika tanba nia objetivu atu dezenvolve detallu liu tan área urbanu, tuir modelu dezenvolvimentu territoriál ne’ebé establèse ona iha Plano Municipal de Ordenamento do Território (PMOT) Bobonaro nian.
Objetivu Prinsipál husi PUSO Maliana mak hanesan tuir mai:
- Orientasaun ba Kreximentu Ordenadu: Orienta dezenvolvimentu sidade Maliana ho forma organizadu no sustentável.
- Hadia Kualidade Moris Populasaun Nian: Promove ambiénte urbano ne’ebé fó kondisaun ida di’ak ba moris komunidade.
- Evita Konflitu ba Uzu Rai no Espasu: Reduz konflitu de interesse entre área industriál, habitasaun no área servisu sira.
- Fasilita Dezenvolvimentu Ekonomiku Urbanu: Fó prioridade ba infrastrutura, equipamentu, espasu konstruidu no enquadramentu jurídiku atu kria ambiénte negósiu favorável, hodi estimula kriasaun empregu no reduz kustu moris.
- Prevene no Reduz Impaktu Dezastre Naturál: Garante planeamentu rai ne’ebé previne risku naturál, proteje vida ema, sasán no ambiente natural.
Iha serimónia lansamentu ne’e, partisipa mos Diretor Jeral Obras Públicas, Diretores Ezekutivu, Diretores Nasionais, Diretores Servisu Munisípal, Administrador Postu, Xefe Suku sira, no konvidadu sira seluk.
Konkulasaun
Lansamentu ofisiál ne’e markadu hanesan etapa importante iha esforsu Governu Timor-Leste, liuhusi MPIE no SEDL, atu promove dezenvolvimentu territóriu ordenadu, sustentável no inklusivu iha nivel lokal, komesando husi sidade Maliana, Munisípiu Bobonaro.
Asesu ba iha ami nia Pajina Facebook. Klik iha ne’e