Kontinua husi Fórum Turizmu 2025 nian, iha loron Sexta-feira, 26 Setembru 2025, Governu Timor-Leste fasilita diálogu modalidade diskusaun meza redonda atu fó plataforma ba komunikasaun direta entre governu, setór privadu no entidade finanseira kona-ba dezenvolvimentu turizmu nasional.
Objetivu diálogu refere mak:
-
Fornese oportunidade ba Governu atu atualiza progresu no inisiativa sira ne’ebé hala’o tiha ona;
-
Fó espasu ba setór privadu atu hato’o preokupasaun, sujestaun no rekomendasaun relevante ba dezenvolvimentu turizmu.
Diskusaun ne’e fahe iha sesaun rua:
- Infraestrutura iha setór turizmu
- Produtu no Servisu Turistiku
Atividade loke no preside hosi S.E. Vise Primeiru Ministru, Sr. Francisco Kalbuadi Lay, no akompanhadu hosi:
- Ministru Transporte no Telekomunikasaun
-
Ministru Agrikultura no Peskas
-
Governador Banko Central
-
Prezidenti Konsellu Administrativu BNCTL
-
Representante Banku Mundial
Diskusaun modera no fasilita hosi Koordenadora UPI-MPIE, Sra. Epi Orleães, no markadu husi prezensa masivu setór privadu husi nível nasional to’o munisípiu, no mos parseiru dezenvolvimentu hanesan Banku Mundial, DFAT, no Embaixada Nova Zelândia.
Diálogu la’o nakloke no ativo, iha ne’ebé membru governu fó klarifikasaun kona-ba prioridade polítika, entantu setór privadu mos identifika lakuna no dezafiu sira ne’ebé bele hatudu direksaun ba esforsu hamutuk.
Em jerál, parte governu ho setór privadu fó kompromisu atu kontinua trabalha hamutuk no intensifika komunikasaun liu husi enkontru regular kada trimestral.
Ekipa téknika husi MPIE sei elabora relatóriu final husi diskusaun meza redonda ne’e, hodi bele fó base ba governu atu halo follow-up no implementa desizaun sira ne’ebé akorda iha plenáriu.
#remata#