Por ocasião da:
Dili, 26 Janeiru 2023
S.E Sekretario Estadu Teras propriedade Diretor Geral Ordenamentu do Territoriu Diretoris gerais husi ministeriu seluk ne’ebe marka prezensa iha ne’e, ba Xefias, prezidente diretur ezekutivu husi instituisoen publika ne’ebe marka prezensa iha dader ida ne’e, ba administrador husi likisa,Reprezentante Prezidente autoridade munisipal Dili, Ho lideres komunitariu sira ne’ebe marka prezensa iha ne’e, husi korpu akademikus reitores sira, ba reprezentante sira husi ajensia internasionais no reprezentante husi LAPI ninian ne’be maka hamutuk ho Ministeriu planu ordenamentu hahu halo levantamentu Planu Urbanu Dili.
Bom dia!
Uluk na-nain hau hakarak agradese tebes, dala ida tan, ita bo’ot sira nia prezensa hodi partisipa iha konsulta publika ida ne’e, hodi fó biban ba desizaun VIII Governu Konstitusional, ne’ebe determina elaborasaun Plano Urbanizasaun Sidade Dili nian.
Ministeriu Planu no Ordenamentu nia kna’ar prinsipal ida, mak dezenvolve sistema planeamentu territorial ne’ebe hatur iha ita nia Lei bazes ordenamentu territoriu ne’ebe preve eskala rua: Nasional no Munisipal.
Atu kumpre kna’ar MPO nian, iha tempu badak sei aprova Planu Nasional Ordenamentu Teritoriu Timor-Leste – PNOT-TL (liu husi Dekretu Lei) núdar instrumentu planeamenu teritorial ne’ebe sei defini kuadru estratejiku ba organizasaun no utilizasaun teritoriu Timor-Leste nian liu husi Modelu Nasional Ordenamentu Territoriu(MNOT-TL), no sei orienta no integra intervensaun publika no privada iha teritoriu nasional ho objetivu atu promove dezenvolvimentu ida ne’ebe integradu justu no sustentavel.
PNOT-TL sei orienta mos instrumentu planeamentu Munsipal, ne’ebe agora dadaun MPO dezenvolve Plano Munisipal Ordenamentu Territoriu iha Munisipiu lima (5) (Ermera, Bobonaro, Lautem, Viqueque no Baucau), ne’ebe sei konklui no aprova iha tinan 2023 nia laran, no mos iha tempu badak sei hahú ho dezenvolvimentu Plano Munisipal Ordenamentu Territorial iha Munisipal sira seluk (Aileu, Ainaro, Covalima, Manufahi, Manatuto, Liquiça no Dili), ne’ebe sei lori ba aprovasaun iha tinan tuir mai.
Aleide Planu Munisipal, sistema planeamenu teritorial, preve mos planu urbanizasaun ka planu uzu solo nian, ne’ebe tenke haktuir ba planeamentu teritorial iha eskala sira seluk.
Tamba ne’e mak Governu desidi katak iha nesesidade duni atu hahú kedas ho planu urbanizasaun Dili nian.
Tamba sa Governu hanoin hahú uluk Planu Urbanizasaun iha Kapital Dili?
Husi-kedas I Governu Konstitusional, dezenvolve ona Planu Urbanizasaun Sidade Dili no Sidade Baucau, ho apoiu GERTIL nian (dezenvolve iha tinan 2004-2006). No mos, konsidera ba dezenvolvimentu Sidade Dili nian durante tinan 7 nia laran, Planu Urbanizsaun Dili hetan atualizasaun husi projetu konjunto entre Governu no JICA (projetu espesifiku dezenvolve iha tinan 2014-2016). Biar Governu durante tinan barak halo investimentu ida hodi dezenvolve instrumentu planeamentu ba ita nia Kapital, ho auzensia implementasuan planu teriorial mak rezulta iha dezafiu no ameasa sira ne’ebe populasaun sira iha Kapital Dili hasoru, to’o ohin loron.
Prosesu konstrusaun Sidade Dili liu husi faze bar-barak no sofre mudansa oin-oin, ho destruisaun no rekonstrusaun lubuk-ida. Husi tempu kolonial, liu husi períodu invazaun, no to’o faze restaurasaun independênsia/konstrusaun Estadu, hamosu kresimentu populasional ida ne’ebe lais, deskontroladu no desproporsional.
Ohin loron, Dili sai sidade ida ho densidade populasional ne’ebe bo’ot liu iha Timor-Leste. Haktuir ba informasaun tinan 2021 nian, Sidade Dili nia populasaun hamutuk 309,331 (trezentos e nove mil, trezentos e trinta e um) habitantes, no estudu balun hatudu mos katak, karik sidade Dili mantein ho problema sira ne’ebe ohin loron hasoru, iha tinan 2030 tuir mai, populasaun Dili nian bele sa’e entre 500 mil to’o 600 mil habitantes. Kresimentu populasaun iha Sidade Dili hamosu dezafiu seluk hanesan: kresimentu dezordenadu, ho nia fraka utilizasaun ba area urbana. Nune’e aumentu trafiku nian, degradasaun ka auzensia husi infraestrutura, no fraka kualidade iha jestaun lixu nian, ne’ebe lori impaktu negativu ba dezenvolvimentu sosioekonomiku sidade Dili nian. Aumenta mos vulnerabilidade ba catastrofes naturais, hanesan inundasaun sira ne’ebe ita hasoru iha marsu tinan 2020, no abril de 2021.
Tamba ne’e mak desizaun atu hahú ho dezenvolvimentu planu urbanizasaun Sidade Dili nian mai ho objetivu atu orienta kresimentu no restruturasaun tesidu urbanu Kapital liu husi zonamentu funsional, ne’ebe sei hadia diak liu tan kualidade sidade nian, liu husi hasa’e kualidade infraestruturas nian no servisu apoiu ba populasaun no ativdade urbana sira, hadia mos funsionamentu ekonomia urbana no mos, kualidade populasaun ne’ebe moris iha Kapital.
Planu ida ne’e tenke iha artikulasaun diak ho planeamentu teritorial iha eskala sira seluk, hanesan PNOT-TL, atu nune’e bele promove dezenvolvimentu iha area sira seluk teritoriu nasional nian, hodi dezaselera ka reduz ezodo rural mai Dili.
Ministeriu Planu no Ordenamentu sei konklui Planu Urbanizasaun Dili iha tinan 2023 nia laran, tamba ne’e mak importante atu rekolla opiniau husi entidade hotu-hotu mak iha intervensaun relevante iha utilizasaun espasu Sidade Dili nian.
Planu ida ne’e sei hatur iha vizaun ida ba ita nia Kapital sei sai sidade ida ne’ebe Vibrante no Reziliente.
Atu atinji mehi ida ne’e PUD sei estabelese estratejia intervensaun ida hodi haluan Sidade Dili to Tibar no Metinaro, no estabele zonas haat (4) ba dezenvolvimentu:
1. Metinaro, ne’ebe sei konsentra infraestrutura sira hotu ba Orgaun Soberani 4 Estadu Timor-Leste nian,Projetu ida ne’e hanaran “Nova Cidade Administrativa” no sei promove kresimentu urbanu (ekonomiku no sosial) iha area Metinaro, atu nune’e mos hamamuk tesidu urbanu historiku Dili nian no haburas atividade seluk iha area neba. Atu implementa ho lais projetu ida ne’e Governu estabelese ona Komisaun Interministerial atu hahú ho estudu ba Nova Cidade Administrativa.
2. Tibar, ne’ebe agora dadaun sai ona sentru industrial, ho Portu Tibar, ne’ebe hahú ona nia aktividade. Nune’e mos Governu iha planu atu dezenvolve tan infraestrutura estatejika seluk iha area Tibar, hanesan Parque Industrial, no sei promove kresimentu industrial no iha expektativa atu loke kampu traballu.
3. Dili (Centro), ne’ebe sei investe iha konservasaun patrimoniu historiku, hodi haburas turismo, habitasaun no servisu sira seluk relasiona ho komersiu.
4. Hera ne’ebe sei kria sentru ba teknolojia no inovasaun. No karik bele, konjuga tan ho produsaun agrikola, haktuir ba aptidaun agrikola iha Hera.
Iha aprezentasaun ohin lorin nian, ita sei kontempla pontus importantes rua hanesan: karakterizasaun ba kondisaun ezistente, Sidade dili nian, ne’ebe temi ona; no mos proposta ba estratejia planeamentu hodi halo intervensaun atu hadia problema sira ne’ebe identifika ona.
Atu konklui hau nia intervensaun, hakarak agradese ba JICA, ne’ebe to’o ohin loron kolabora ho Governu Timor-Leste iha prosesu dezenvolvimentu Planu Urbanizasaun Dili nian, nune’e mos agradese ba Konsultora LAPI ITB, ne’ebe hamutuk ho Diresaun Nasional Planeamentu Urbanu, halo esforsu tomak hodi konklui kompromisu atu dezenvolve instrumentu planeamentu teritorial, no materializa Governu nia Politica.
Dala ida tan, obrigada ba it bo’ot sira nia partisipasaun no kolaborasaun.
Votos de bom trabalho!
Obrigadu Barak!
+15
All reactions:
47