Bandung, 20 Outubru 2026 – Timor-Leste hetan rekoñesimentu importante ida iha nivel rejionál ASEAN, liuhusi kondekorasaun ne’ebé fó ba Eng. Gastão Francisco de Sousa, Ministru Planeamentu no Investimentu Estratéjiku, nu’udar Distinguished Honorary Fellow husi ASEAN Federation of Engineering Organisations (AFEO).
Kondekorasaun prestijiadu ne’e entrega ofisialmente iha loron 20 Outubru 2026, durante Konferénsia CAFEO 44, ne’ebé hala’o iha Bandung, Indonézia, ho tema “Future of ASEAN: Shared Prosperity and Humanity Through Inclusive and Sustainable Industrialisation”.
Sertifikadu rekoñesimentu ne’e asina husi Dr.-Ing. Ir. Ilham Akbar Habibie, Prezidente AFEO, no Ir. Prof. Dr. Tan Chee Fai, Sekretáriu-Jerál AFEO.
Títulu Distinguished Honorary Fellow reprezenta rekoñesimentu aas husi AFEO ba lider no profisionál iha área enjenharia sira ne’ebé fó kontribuisaun signifikativa ba dezenvolvimentu infrastruktura, planeamentu estratéjiku, dezenvolvimentu institusionál no kooperasaun rejionál.
Rekoñesimentu ne’e fó hanesan apresiasaun ba dedikasaun no kontribuisaun Eng. Gastão Francisco de Sousa iha promosaun no implementasaun polítika, planu no projetu estratéjiku sira ne’ebé suporta dezenvolvimentu sustentável, tuir nesesidade no kapasidade ekonómika husi nasaun membru sira no rejiaun ASEAN.
Ba Timor-Leste, rekoñesimentu ne’e reprezenta prestíjiu importante no reflete progresu país nian iha área enjenharia, planeamentu no kooperasaun rejionál. Nune’e mós, rekoñese kompeténsia no kontribuisaun profisionál husi enjenheiru Timoroan iha nivel internasionál.
Eng. Gastão Francisco de Sousa, ne’ebé mós membru National Engineers Association of Timor-Leste (ANE-TL), iha esperiénsia naruk iha jestaun no dezenvolvimentu infraestrutura nasionál. Nia antes ne’e servisu nu’udar Ministru Obras Públikas entre 2012 no 2017, no hahú husi 1 Jullu 2023 asume kargu Ministru Planeamentu no Investimentu Estratéjiku iha IX Governu Konstitusionál, lideradu husi Primeiru-Ministru Kay Rala Xanana Gusmão.
Serimónia entrega rekoñesimentu ne’e hala’o hamutuk ho entrega sertifikadu Associate ASEAN Engineer (AAE) ba enjenheiru joven sira husi Malaysia, Indonézia no nasaun seluk, nu’udar parte husi esforsu AFEO atu promove dezenvolvimentu profisionál no kooperasaun entre komunidade enjenharia iha rejiaun ASEAN.
Media MPIE
Dokumnetasaun bele asesu iha : https://www.facebook.com/share/p/1FExsjYPws/