Díli, 27 Maiu 2026 – Sua-Eselénsia Ministru Planeamentu no Investimentu Estratéjiku, Eng. Gastão Francisco de Sousa, partisipa iha Reuniaun Konsellu Ministrus Extraordináriu ne’ebé lidera hosi Sua-Eselénsia Primeiru-Ministru, Kay Rala Xanana Gusmão, atu analiza progresu ezekusaun Orsamentu Jerál Estadu (OJE) ba tinan fiskál 2026.
Reuniaun ne’e realiza iha Auditorium Kay Rala Xanana Gusmão, Ministériu Finansas, Airarak-Laran, Díli, ho partisipasaun membru Governu sira hotu no mós responsavel sira hosi institutu no organizmu sira ne’ebé integra iha administrasaun indireta Estadu nian.
Durante reuniaun extraordináriu ne’e, Governu halo avaliasaun ba situasaun ezekusaun orsamentál hosi departamentu governamentál no organizmu autónomu sira, tuir Orsamentu Jerál Estadu ba tinan 2026 ne’ebé aprova ona hosi Lei n.º 8/2025, loron 27 Novembru 2025.
Tuir dadus ne’ebé aprezenta iha reuniaun, ezekusaun OJE 2026 atinje ona 30% hosi períodu loron 1 Janeiru to’o loron 26 Maiu 2026. Hosi montante orsamentu totál, inklui seguransa sosiál, ho valor hamutuk USD 2,445 biliaun, Governu ezekuta ona aproximadamente USD 736 millaun.
Iha sorumutu ne’e, partisipa sira halo análize ba dezafiu prinsipál sira ne’ebé afeta ezekusaun orsamentál, liuliu relasiona ho implementasaun Kódigu Aprovizionamentu no Kontratus Públikus foun. Diskuti mós medida estratéjika sira atu reforsa kapasidade ezekusaun programa no projetu sira ne’ebé planeia ona iha OJE 2026.
Aleinde ne’e, reuniaun mós simu aprezentasaun no análize kona-ba funsionamentu sistema informátiku aprovizionamentu nian, ho objetivu atu asegura efisiénsia, transparénsia no acelerasaun prosesu aprovizionamentu públiku iha instituisaun Estadu sira.
Ministru Planeamentu no Investimentu Estratéjiku reafirma komprimisu Ministériu nian atu kontinua apoia ezekusaun programa prioritáriu Governu nian, hodi garante utilizasaun orsamentu Estadu ne’ebé efetivu, efisiente no orientadu ba dezenvolvimentu sustentável Timor-Leste.