Dili, Palásiu Prezidensiál Nicolau Lobato – 4 Juñu 2025
Prezidente Repúblika, J. Ramos-Horta hasoru malu ho Ministru Planeamentu no Investimentu Estratéjiku, Eng. Sr. Gastão Francisco de Sousa, iha Palásiu Prezidensiál ohin hodi haree progresu dezenvolvimentu infraestrutura nasionál no diskute Orsamentu Jerál Estadu 2025 ba infraestrutura nian.
Ministru Gastão informa ba Prezidente katak ida-ne’e hanesan sira-nia enkontru daruak kona-ba tópiku ne’e, ho foku partikulár kona-ba oinsá fundu petrolíferu ne’e utiliza hela ba projetu infraestrutura sira no kapasidade ezekusaun jerál ba inisiativa sira-ne’e. Prezidente hatudu interese maka’as atu komprende alokasaun ba fundu infraestrutura, inklui empréstimu no estatutu projetu sira ne’ebé agora daudaun iha faze aprovizionamentu.
Ministru Gastão fornese atualizasaun ida kona-ba área xave oioin, hodi nota katak projetu liu 1,300 maka agora daudaun iha fundu infraestrutura nia okos. Ministru detalla katak iha tinan ne’e, projetu hamutuk 77 maka konklui ona sira-nia faze aprovizionamentu, enkuantu 99 sei iha prosesu nia laran. Atensaun espesiál fó ba dezenvolvimentu infraestrutura iha área fronteira sira, inklui estrada, postu saúde, eskola, no merkadu, husi Batugade to’o Suai. Ministru destaka mós papél Konsellu Administrativu ba Fundu Infraestrutura (CAFI) no subliña katak ezekusaun orsamentu hotu-hotu ba tinan 2025 tenke bazeia ba programa no planu orsamentu ba tinan oin.
Diskusaun ne’e mós ko’alia kona-ba Timor-Leste nia preparasaun ba ASEAN, ho investimentu iha infraestrutura, hanesan projetu aeroportu ne’ebé krusiál. Kona-ba projetu Pelican Paradise, Ministru Gastão de Sousa afirma katak diskusaun sira sei la’o hela iha grupu interministeriál ida nia laran hodi aborda rekizitu espesífiku sira no apoiu potensiál governu nian, to’o agora laiha desizaun finál ne’ebé halo.