𝐃𝐢𝐥𝐢, 𝟐𝟖 𝐌𝐚𝐫𝐬𝐮 𝟐𝟎𝟐𝟓, Ministeriu Planeamentu no Investimentu Estratéjiku hala’o workshop kona-ba preparasaun relatoriu monitorizasaun ba progresu implementasaun PED 2011-2030 ba períodu 2015-2024, ho objetivu atu halo disseminasaun ba matadalan no fornese formasaun ba ofisiál governu sira oinsa atu prienxe templatu kolesaun dadus ho lolos, konsistente no konfiável. Nune’e, dadus hirak ne’e bele fasilita elaborasaun planu mediu prazu
governu 2026-2030 ho kualidade diak.
Iha diskursu, Ministru Planeamentu Investimentu Estratéjiku, Eng. Gastão Francisco de Sousa hatete “PED 2011-2030 aprova sai nudar matadalan ba planu dezenvolvimentu sira ne’ebé trasa dalan ba futuru ida ne’ebé prósperu, sustentável no ekuitativu ba Timor-Leste. PED 2011-2030 mak hatúr Timoroan ninia aspirasaun ba dezenvolvimentu sira iha setor oioin, hosi dezenvolvimentu infraestrutura, diversifikasaun ekonómika, inkluzaun sosiál no boa governasaun.”
Avaliasaun ida ne’e la’ós foin mak realiza, maibé atividade ne’e hanesan, hala’o ona iha governasaun anteriór, hahu husi Faze Primeiru 2011-2015, Faze Segundu 2016-2020, no sesaun ohin halo revizaun kumulatívu to’o 2024.
No faze revizaun iha tinan ida ne’e, MPIE mak koordená servisu planeamentu médiu prazu no monitorizasaun ba rezultadu husi implementasaun PED 2011-2030 bazeia ba Lei Orgánika IX Governu Konstitusionál DL.46/2023 no Lei Orgánika MPIE DL.68/2023.
Durante workshop, partisipantes hetan konhesimentu oinsa atu utiliza formatu kolesaun dadus ba monitorizasaun progresu implementasaun PED 2011-2030, hodi halibur dadus sira hosi dokumentu ofisiál sira ne’ebé disponivel – pur ezemplu, relatoriu anuál sira, dadus sensus, relatoriu estatístika, relatoriu progresu no fonte informasaun seluk ne’ebé relevante. Hirak ne’e hotu sei kontribui ba enkuadramentu padronizadu atu akompanha progresu implementasaun PED 2011-2030, fornese hanoin sira ne’ebé bele sukat ba atinjimentu setorál, no asegura konsisténsia ba dadus husi linha ministeriu no ajénsia sira.
Oradores sira husi MPIE nian
Partisipantes husi workshop ida ne’e kompostu husi kargu Diretor-Jerais, Diretores Nasionais, Chefe Departamentu no tékniku profisionál sira husi Gabinete Primeriu-Ministru, Gabinete Vice-Primeiru Ministru, Ministeriu Kordenador Asuntu Ekonomiku no Ministeriu Turismo no Ambiente; Gabinete Vise Primeiru-Ministru; Ministeriu Asuntu Kombatentes Libertasaun Nasional no Ministru Dezenvolvimentu Rurál no Habitasaun Komunitária; Ministeriu Agrikultura Pekuaria Peskas no Floresta; Ministeriu Komérsiu no Indústria; Ministeriu Saúde; Ministeriu Edukasaun; Ministeriu Ensino Superior Sciencia no Cultura; Ministeriu Solidaridade Social no Inkluzaun; Ministeriu Interior; Ministeriu Defeza; Ministeriu Transporte no Komunikasaun; Ministeriu Justisa; Ministeriu Obras Públikas; Ministeriu Negósiu Estranjeirus no Ministeriu Juventude, Desportu, Arte no Kultura, Sekretariu Estado Igualdade no seluk tan.