Laleia, Manatuto, 23 Jullu 2026 – Sua Exelénsia Ministru Planeamentu no Investimentu Estratéjiku (MPIE), Eng. Gastão Francisco de Sousa, partisipa iha serimónia lansamentu Projetu Instalasaun Solar Fotovoltaiku (PV), ne’ebé realiza iha Postu Administrativu Laleia, Munisípiu Manatuto.
Serimónia lansamentu prezide husi Sua Exelénsia Prezidente Repúblika, Dr. José Ramos-Horta, no Sua Exelénsia Primeiru-Ministru, Kay Rala Xanana Gusmão, ho partisipasaun membru Governu, parseiru dezenvolvimentu, reprezentante ajénsia internasionál no kompañia sira ne’ebé envolve iha implementasaun projetu.
Projetu Solar Fotovoltaiku ida-ne’e hanesan investimentu estratéjiku Governu atu reforça sistema eletrifikasaun nasional, hodi hamenus kustu operasionál, aumenta efisiénsia fornecimentu eletrisidade no promove utilizasaun enerjia renovável iha Timor-Leste.
Iha nia intervensaun, Prezidente Repúblika no Primeiru-Ministru apresia servisu hamutuk entre Governu, parseiru internasionál no setor privadu ne’ebé kontribui ba preparasaun no realizasaun projetu refere. Sira mos manifesta konfiansa katak implementasaun projetu sei kontribui ba modernizasaun sistema enerjia nasional durante períodu implementasaun tinan tolu, husi 2026 to’o 2029.
Primeiru-Ministru Kay Rala Xanana Gusmão hateten katak projetu ne’e sei instala Sentrál Solar Fotovoltaiku ho kapasidade 72 Megawatts (MW) no Sistema Armazenamentu Enerjia iha Bateria ho kapasidade 36 Megawatts-ora (MWh), atu fornese eletrisidade ba rede nasional.
“Projetu ne’e sei instala sentrál solar ho kapasidade 72 Megawatts (MW) no sistema armazenamentu enerjia iha bateria ho kapasidade 36 Megawatts-ora (MWh), atu fornese eletrisidade ba rede nasional, diversifika fonte enerjia no hamenus dependénsia Timor-Leste ba kombustível importadu,” dehan Primeiru-Ministru.
Projetu ida-ne’e espera bele hasa’e seguransa enerjétika nasional, diversifika fonte enerjia no fó apoiu ba dezenvolvimentu ekonomia sustentável, liuhosi reduza dependénsia ba kombustível fósil importadu no promove utilizasaun enerjia renovável.
Partisipasaun S.E. Ministru Planeamentu no Investimentu Estratéjiku, Eng. Gastão Francisco de Sousa, iha serimónia ida-ne’e reafirma kompromisu MPIE atu kontinua apoia planeamentu no implementasaun investimentu estratéjiku iha setor infraestrutura bázika, liuliu enerjia, ne’ebé sai fundamentu importante ba dezenvolvimentu nasional.
Governu ne’ebé lidera husi Primeiru-Ministru Kay Rala Xanana Gusmão kontinua fó prioridade ba dezenvolvimentu infraestrutura estratéjika atu kria ambiente favorável ba investimentu nasional no internasionál, tuir vizaun Planu Estratéjiku Dezenvolvimentu Nasional (PEDN). Iha kontestu ida-ne’e, MPIE kontinua halo análize no identifika prioridade infraestrutura ba períodu 2026–2030, hodi garante katak investimentu públiku responde ba nesesidade dezenvolvimentu sustentável no benefísiu ba povu Timor-Leste.
Projetu Solar Fotovoltaiku iha Laleia representa pasu importante ida ba tranzisaun Timor-Leste ba sistema enerjia ne’ebé modernu, sustentável no resiliente, ne’ebé sei suporta kresimentu ekonomiku, promove sustentabilidade ambientál no melhora kualidade moris komunidade sira iha futuru.
(REMATA)
Dokumentasaun Klik iha :