Dili, 23 Jullu 2026 – Sua Exelénsia Ministru Planeamentu no Investimentu Estratéjiku (MPIE), Eng. Gastão Francisco de Sousa, akompaña Sua Exelénsia Primeiru-Ministru, Kay Rala Xanana Gusmão, iha serimónia abertura Formasaun Tékniku Enjiñeiru Integrada Munisipál, ne’ebé realiza iha Salaun Delta Nova, Dili.
Formasaun ida-ne’e organiza atu hametin kapasidade tékniku enjiñeiru munisipál sira iha implementasaun projetu sira husi Programa Dezenvolvimentu Integradu Munisipál (PDIM) no Programa Nasionál Dezenvolvimentu Suku (PNDS), hodi prepara rekursu umanu ba implementasaun polítika desentralizasaun no Poder Lokál.
Iha nia intervensaun, Primeiru-Ministru Kay Rala Xanana Gusmão apela ba partisipante sira atu aproveita máximu oportunidade formasaun ne’e hodi hasa’e koñesimentu no kapasidade profissional.
“Imi tenke aproveita formasaun ida-ne’e atu hametin kapasidade. Bainhira desentralizasaun implementa, munisípiu ne’ebé preparadu liu iha finansas, planeamentu, administrasaun no ezekusaun mak sei bele responde di’ak liu ba povu. Kaer metin prinsípiu Osan Povu Nian Jere ho Di’ak no servisu ba rai no povu ho laran tomak,” dehan Primeiru-Ministru.
Primeiru-Ministru subliña katak kapasidade téknika no jestaun ne’ebé forte sei sai baze importante atu garante implementasaun Poder Lokál ho efisiénsia, transparénsia no responsabilidade, hodi hasa’e kualidade servisu públiku no dezenvolvimentu infraestrutura iha munisípiu sira.
Iha oportunidade hanesan, S.E. Ministru Planeamentu no Investimentu Estratéjiku, Eng. Gastão Francisco de Sousa, enfatiza katak tékniku munisipál sira, liuliu tékniku PNDS no PDIM, presiza kontinua hasa’e kapasidade la’ós de’it iha área enjiñaria no fiskalizasaun projetu, maibé mós iha planeamentu, jestaun no preparasaun institusionál ba implementasaun Poder Lokál.
Ministru MPIE afirma katak dezenvolvimentu infraestrutura iha nível munisipál presiza apoiu husi rekursu umanu ne’ebé kompetente, atu garante katak projetu sira planeadu bele implementa ho padraun tékniku, tempu no kualidade ne’ebé di’ak.
Husi parte Autoridade Dezenvolvimentu Nasionál, I.P. (ADN, I.P.), Diretór Ezekutivu Januário Maia Guterres esplika katak jestaun no fiskalizasaun projetu Governu hotu-hotu tenke tuir padraun no prosedimentu tékniku ADN.
Nia hateten katak objetivu prinsipal formasaun ida-ne’e mak atu hasa’e kapasidade tékniku munisipál sira iha área planeamentu, implementasaun, monitorizasaun, fiskalizasaun no kontrolu kualidade ba projetu infraestrutura iha nível lokál.
“ADN nafatin prontu atu fó apoiu no asisténsia téknika ba ekipa PDIM no PNDS, liuliu durante implementasaun projetu iha terrenu. Bainhira mosu difikuldade téknika, ADN sei kontinua halo koordinasaun, fó orientasaun no buka solusaun hamutuk ho ekipa téknika sira, hodi asegura katak projetu sira implementa ho di’ak no atinji objetivu dezenvolvimentu ne’ebé planeadu,” hateten Januário Maia Guterres.
Formasaun refere involve partisipante na’in 56, kompostu husi tékniku PDIM na’in 28 no tékniku PNDS na’in 28, no fasilita husi oradór na’in neen hosi asesór no tékniku sénior ADN, I.P.
Treinamentu ne’e realiza durante loron rua, 23–24 Jullu 2026, iha Salaun Delta Nova, Dili, no foka ba hametin kapasidade téknika enjiñaria, planeamentu, jestaun projetu, fiskalizasaun no kontrolu kualidade infraestrutura iha nível munisipál.
Partisipasaun ativa husi MPIE iha atividade ida-ne’e reflete kompromisu Ministériu atu kontinua investe iha dezenvolvimentu rekursu umanu no hametin kapasidade instituisaun sira iha nível nasional no munisipál, hodi apoia implementasaun programa prioridade Governu no prepara kondisaun ba implementasaun efetiva Poder Lokál.
(REMATA)
Dokumentasaun Klik iha :
https://www.facebook.com/share/p/1CoXTs9DYc/