Ohin, loron 17 fulan-marsu tinan 2025, Ministru Planeamentu no Investimentu Estratéjiku, Eng. Gastão Francisco de Sousa hetan Konvite ba Talk show husi “Página do Governo”. Hodi kontinua halo gravasaun ba programa “Página do Governo”. Iha edisaun dahaat.
Liu husi Intervista ne’e S.E Eng. Gastão Francisco de Sousa, ne’ebé ko’alia kona-ba kestaun sira relasiona ho dezenvolvimentu ekonómiku no sosiál, infraestrutura estratéjika no investimentu sustentável iha país ne’e.
Durante entrevista ne’e, S.E Ministru Eng. Gastão Francisco de Sousa destaka prioridade sira hosi ninia ministériu ba promosaun dezenvolvimentu ekonómiku no sosiál, nune’e mós ezekusaun infraestrutura estratéjika sira ne’ebé la’o hela, no subliña ninia impaktu hodi hadi’a kondisaun moris populasaun sira-nian no kreximentu ekonómiku.
Transparénsia no jestaun di’ak ba rekursu públiku ne’ebé destina ba projetu dezenvolvimentu sira mós iha hela análize, liuliu atensaun ba papél Komisaun Nasionál Aprovizionamentu nian iha fiskalizasaun no auditoria infraestrutura, atu nune’e bele prevene irregularidade no promove integridade iha ezekusaun projetu. Diskute mós kona-ba mekanizmu koordenasaun entre Ajénsia Dezenvolvimentu Nasionál no Ministériu Obras Públikas atu asegura efisiénsia boot-liu iha ezekusaun obra sira.
Ministru salienta mós papél hosi Fundu Kapitál Umanu ba Dezenvolvimentu iha kapasitasaun rekursus umanus iha Timor-Leste, hodi fó detallu kona-ba inisiativa prioridade sira ne’ebé finansia hosi fundu ida-ne’e no nia kontribuisaun ba dezenvolvimentu profisionál no edukasionál populasaun nian.
Iha nia intervensaun ikus, Ministru Gastão Francisco de Sousa fahe vizaun estratéjiku husi ninia ministériu ba futuru país nian, hodi destaka esforsu Governu hodi implementa reforma no investimentu estruturál sira ne’ebé ho objetivu atu asegura dezenvolvimentu sustentável no inkluzivu.
“Página do Governo” hanesan espasu komunikasaun institusionál ida ne’ebé reforsa transparénsia no prestasaun kontas kona-ba polítika no programa governu nian, ne’ebé permite populasaun atu akompaña, ho forma klaru no objetivu Ezekutivu nia asaun sira.
Talk show ida-ne’e, inisiativa ida ne’ebé lidera husi Ministru Prezidénsia Konsellu Ministrus no Portavós Governu, Agio Pereira, ne’ebé kolabora ho Rádiu no Televizaun Timor-Leste (RTTL), ho Nélia Chaves nu’udar aprezentadora no Ika Moniz nu’udar produtora ezekutiva, no filma husi RTTL no hetan apoiu tékniku husi ekipa mídia Gabinete Primeiru-Ministru, Gabinete Porta-vos Governu, Prezidénsia Konsellu Ministrus no gabinete hosi governante ne’ebé hetan entrevista.
Programa do Governo nia transmisaun dahuluk fó sai iha loron 14 fulan-marsu tinan 2025, iha RTTL no iha rede sosiál, ho Ministru Obras Públikas nu’udar bainaka dahuluk. Edisaun daruak, ho partisipasaun hosi Ministru Administrasaun Estatál, sei fó sai iha loron-sesta oin mai, iha loron 21 fulan-marsu.
Ministru Agio Pereira hateten katak programa ne’e nu’udar “espasu ida ba diálogu no transparénsia, ne’ebé permite populasaun hodi akompaña, ho forma klaru no objetivu, asaun sira governu nian”.
Governu konvida sidadaun hotu-hotu atu akompaña transmisaun no partisipa ativu iha kanál komunikasaun institusionál foun ida-ne’e.