Dili, 15 Fevereiru 2023,
S.E. Vise-Primeiru-Ministru no Ministru Planu no Ordenamentu, Eng. José Maria dos Reis hamutuk ho Sekretáriu Estadu Asuntu Kombaténte Libertasaun Nasionál, Julio da Conceicao ‘Loro Mesak”, Membru Deputadu sira husi Parlamentu Nasionál, eis-Jenerál Reformadu Lere Anan Timur no Embaixadóra Portugal ba Timor-Leste, Manuela Bairos, halo lansamentu ba ofisiál hodi tau fatuk dahuluk ba konstrusaun Jardin Chama Eterna.
Iha serimónia hatuur fatuk dahuluk ne’e Vise-Primeiru-Ministru no Ministru Planu no Ordenamentu Eng. José Maria dos Reis hatete, konstrusaun Jardin Chama Eterna, ne’e importánte tebes ba Estadu Timor-Leste hodi hakat tán pájina foun ida iha ita nia prosesu prezervasaun memória luta povu Maubere ni’an.
“Hanesan ita hatene no sente duni husi sofrimentu no luta koletivu husi povu Maubere ni’an bainhira nia hamriik hodi rezisti hasoru domíniu no okupasaun rai seluk nian. Memória hirka ne’e maka halo estadu iha responsabilidade hodi buka halibur nafatin hodi sai memória koletiva husi jerasaun ba jerasaun atu kontina memóriza no valiriza ba istória Luta ba Libertasaun Nasionál Timor-Leste ba Estadu Livre no Independente”, tenik Reis.
Vise-Primeiru-Ministru hatutan liu-tan katak ho serimónia eskavasaun ne’e hatudu Konstrusaun ba Jardin Chama Eterna hahu’u.
“Ita hanaran Jardin Chama Eterna, hanesan pasu signifikativu ida ba divulgasaun patrimóniu istoriku país nian no hametin identidade nasionál. Bainhira ita dehan jardín tanba sei buras ho memória luta. Memória ida ne’ebé maka nakonu ho prinsípiu no valór husi Eroi no Mártir Pátria sira, buras hanesan aliserse ba jerasaun foun sira hodi asumu tarefa primordial libertasaun nasionál, hodi kontinua banati tuir saida maka prinsípiu bo valór, sentidu pertensa, abnegasaun no totalidade ba povu no nasaun”, hatete Vise-Primeiru-Ministru.
Jardín Chama Eterna ne’e sei fó espasu espozitivu ida ba Arkivu no Múzeu Rezisténsa Timorense hodi promove no patrosina asaun sira ho natureza kulturál, siéntifika no edukativa iha prezervasaun no divulgasaun memória luta Rezisténsia husi Povu Timor-Leste, rekonesementu no valorizasaun sosiál veterana sira-nian, konsolidasaun identidade nasionál, istória kontemporánea Timor-Leste nian no promosaun páz no respeitu ba Direitus Umanus no bele enkuadra memória ida kona-ba periódu istóriku husi Administrasaun Koloniál Portugeza no antesedente husi invazaun militár Indonézia.
Iha serimónia lansamentu ne’e ida ne’e, S.E. Vise-Primeiru-Ministru no Ministru Planu no Ordenamentu, Eng. José Maria dos Reis, lori naran Governu Konstiusionál daualu enkoraja nafatin Diretúr Ezekutivu & Prezidente AMRT, I.P ho funsionáriu tomak hodi kontinua halo servisu ida di’ak tebes ba prezervasaun memória luta Timor-Leste ni’an. ***REMATA/MPO
VALORAR E VALORIZAR