Dili, 10 Fevereiru 2023,
Konsellu Administrasaun Fundus Infraestrutura (KAFI) konvoka reuniaun estraordináriu ho ajenda únika, aprovasaun termu referénsia ba Semináriu Nasionál Infraestrutura ho tema: “Reflesaun kona-ba tinan 20 dezenvolvimentu infraestrutura iha Timor-Leste: Kualidade, Rezilénsia no Sustentabilidade”.
Programa semináriu nasionál ba infraestrutura ne’e inisiativa husi S.E. Vise-Primeiru-Ministru no Ministru Planu no Ordenamentu nudár Prezidente Konsellu Administrasaun Fundu Infraestrutura ho membru KAFI, liu husi deliberasaun KAFI nian, ho objetivu atu promove partisipasaun interviniente sira husi setór hotu-hotu hanesan infraestrutura, polítika, tékniku no seluk tan hodi bele halo diskusaun kona-ba setór infraestrutura no promove vizaun ne’ebé kualidade liu, rezilénsia no sustentabilidade.
Tuir kalendáriu, semináriu refere sei realiza iha loron 21-23 marsu 2023. Lokál, Auditóriu Ministériu Finansas ho totál partisipante hamutuk na’in 250 to’o 300, inklui konvidadu de onra.
Reuniaun KAFI estraordináriu ne’e prezidi husi Vise-Primeiru-Ministru no Ministru Planu no Ordenamentu, Eng. José Maria dos Reis, nudár Prezidente KAFI no partisipa husi Ministru Finansas Dr. Rui Gomes, Ministru Obras Públika em karegadu funsaun hanesan Ministru Transporte no Telekomunikasaun nudár membru KAFI, no Diretóra Ezekutiva Sekretariadu Grande Projeitu, Odete da Costa Vitor, Diretúr CNA Herminggardo Albano Soares, Diretúr Ezekutivu AND, I.P. Mariano Reinato da Cruz no tékniku sira hotu.***REMATA/MPO
VALORAR E VALORIZAR