Dili, 28 Fevereiru 2023
Iha loron 28 fulan Fevereiru 2023, Vise-Primeiru-Ministru no Ministru Planu no Ordenamentu lidera sorumutu interministeriál no interajénsia ida hodi aborda kona-ba implementasaun akordu koperasaun ba asisténsia téknika husi banku investimentu Europeu.
Vise-Primeiru-Ministru no Ministru Planu no Ordenamentu iha nia intervensaun atualiza fila-fali ba parseiru dezenvolvimentu sira kona-ba rekomendasaun projeitu rua husi komisaun interministeriál nian maka hanesan; Be’e no Saneamentu, Réjidu Sólidu Munisipál no Agroflorestasaun.
Progresu husi projeitu rua ne’e maka finaliza ona faze estudu pre-viabilidade husi Konsultóra COWI no hahú tama ba faze estudu viabilidade. Objetivu husi estudu ne’e maka atu promove projeitu dezenvolvimentu be’e ho konseitu ida integradu no sustentável ne’ebé bele suporta ba dezenvolvimentu sosiál no ekonómiku, ho perspetiva ambientalista. Allende ne’e bele hetan artikulasaun ho projeitu sira seluk ba área refere, ne’ebé governu implementa daudaun hanesan, Planu Mestre ba Be’e no Saneamentu Aileu, Liquiçá no Gleno.
Iha ámbitu Jestaun Rezídu Sólidu, estudu ne’e bele mellora ambiente, hodi proteje tasi no rai maran, nune’e mós bele promove ho di’ak atividade iha setór seluk no iha artikulasaun ho projetu sira ne’ebé governu dezenvolve ona, nune’e mós amplia atuasaun iha territóriu tomak.
Iha setór agroflorestasaun, presija dezenvolve area basia idrográrika iha area Lo’es no Ira Bere.
Reuniaun komisaun interministeriál ne’e lidera husi S.E Vise Primeiru Ministru no Ministru Planu no Ordenamentu, José Maria dos Reis, no partisipa husi Ministru Finansas, Rui Gomes, Ministru Obras Públika, Abel Pires da Silva, Ministru Agrikultura, Pedro dos Reis, Vise-Ministru Administrasaun Estatál, Lino de Jesus Torrezão, Embaixadór Uniaun Europeu iha Timor-Leste, Marc Fiedrick, Xefe Divizaun Ásia Pasífiku ba Investimentu Banku Europeia, Edvardas Bumsteinas, Benoit Cambier, Diretúr ba Projeitu Cowi, Michael Jacobse no Prezidente Be’e Timor-Leste (BTL), Diretúr Jerál no Diretúr Nasionál sira husi instituisaun relevante. REMATA/MPO
VALORAR E VALORIZAR