Dili, 10 Janeiru 2023,
Centru Planeamentu Integradu (CPI), Ministériu Planu no Ordenamentu iha loron 10 fulan Janeiru tinan 2023, organiza workshop tékniku ba asuntu temátiku pilar daru’ak husi Planu Estratéjiku Dezenvolvimentu-Reajustadu (PED-R 2023-2038), “Ekonomia Diversifikadu, Inkluzivu no Sustentável”.
Workshop tékniku ne’e halo iha ambitu hodi halibur proposta estratéjika, enkuadramentu rezultadu no planu operasionál ba Planu Estratéjiku Dezenvolvimentu Reajustadu, husi Tékniku sira husi Ministériu no Instituisaun relavante kona asuntu tematiku “Dezenvolvimentu Ekonómia Sustentável” ho nia sub-setór sira maka hanesan Agrikultura, Peskas & Florestas, Turizmu & Arte Kriativa & Inovativa, Setór Privadu, Koperativa & Setór Públiku, Ekonómiku Vibrante, Indústria Rekursu Naturais (Petròliu & Mineiru) no Komérsiu no Industria.
Vise-Primeiru-Ministru no Ministru Planu no Ordenamentu, Eng. José Maria dos Reis, iha nia lia maklokek, haktuir katak, PED 2011-2030 nia frakeza ida maka laiha planu operasional. Tanba ne’e difikulta iha prosesu implementasaun no susar atu sukat nia atinjimentu sira. Ho nune’e VPM husu ba tékniku no espertu husi Ministériu sira atu fó sira nia hanoin estratéjika sira hodi bele produz planu operasionál ba PED-Reajustadu 2023-2038 ida kualidade. Nia haktuir katak ho Planu Operasionál, sei defini prioridade sira ne’ebé presija halo iha tinan lima dahuluk, no tinan lima tuir mai, hodi bele atinji metas jeral sira husi PED-Reajustadu.
Allende ida ne’e, Ministru Eng. Jose Reis mos haktuir kona ba situasaun ekonomika Timor-Leste ne’ebé diresiona nia-an hela ba presipisiu orsamentál. Ministériu Finansas halo estimasaun katak ho ritmu Orsamentu Jerál de Estadu atuál, Timor-Leste nia fundu husi petróliferu sei bele de’it sustenta nia ekonomia to’o 2035. Iha periudu ida ne’e, bainhira laiha reseita alternativa, maka Timor-Leste sei tama ba Presipisiu Orsamentál. Tanba ne’e Ministru reitera fila-fali katak Reajustamentu PED ne’e hanesan pasu ida ne’ebé Governu halo atu hahu hanoin ona pasu sira ne’ebé ita ténke halo atu dezvia Timor-Leste husi dalan ba presipisiu orsamentál.
Workshop Tékniku loron daru’ak halibur diretur jerál, diretur nasionál, tékniku, asesór, péritu husi Gabinete Primeiru Ministru, Ministériu Turizmu, Komérsiu no Industria (MTCI), Ministériu Agrikultura e Pescas (MAP), Ministériu Finansas (MF), Sekretária Estadu Koperativa (Secoop), Institutu Públiku no Ajénsia autónomu sira hanesan, IQTL, SERVE.IP, IPG.IP, CLN no ANPM.
Workshop Tékniku kona-ba Proposta “Medida Estratéjika, Enkuadramentu Rezultadu no Planu Operasionál husi Planu Estratéjiku Dezenvolovimentu 2023-2038” sei hala’o ba pilar lima Planu Estratéjiku Dezenvolvimentu – Reajustadu 2023-2038. Workshop ba Pilar III “Dezenvolvimentu Urbanu no Rurál Ekilibradu” sei halao iha loron 12 fulan Janeiru tinan 2023. Workshop ba Pilar IV “Konetividade no Vantajen Komparativu” sei hala’o iha loron 13 fulan Janeiru tinan 2023. No Pilar V “Paz, Justisa no Instituisaun Forte” sei halao iha loron 16 fulan Janeiru tinan 2023.***REMATA/MPO