DILI, 16 Abríl 2026 — Sua Exelénsia Ministru Planeamentu no Investimentu Estratéjiku (MPIE), Eng. Gastão Francisco de Sousa, partisipa iha sorumutu Konsellu Ministrus ne’ebé aprova kriasaun komisaun interministeriál atu akompaña projetu konstrusaun Sentru Konvensaun Internasionál (SKI).
Desizaun ne’e foti iha reuniaun Konsellu Ministrus iha loron Kuarta (15/04/2026), iha Palásiu Governu, Dili, tuir proposta ne’ebé aprezenta hosi Vise-Primeiru-Ministru, Ministru Koordenadór ba Asuntus Ekonómikus no Ministru Turizmu no Ambiente, Francisco Kalbuadi Lay.
Sua Exelénsia Primeiru-Ministru, Kay Rala Xanana Gusmão, mós atualiza rezultadu reuniaun ne’e ba Sua Exelénsia Prezidente Repúblika, José Ramos-Horta, liu hosi reuniaun semanál iha Palásiu Prezidensiál Nicolau Lobato, Bairru-Pité, iha loron Kinta (16/04/2026).
Iha nia intervensaun, Primeiru-Ministru destaca importánsia projetu SKI ne’e liga ho preparasaun Timor-Leste atu simu eventu internasionál sira, inklui reuniaun ASEAN iha futuru. Nia mós hateten katak Governu foti medida sira atu garante espasu no fasilidade adekuadu, inklui koordenasaun ho parseiru hanesan Pelican Paradise, atu otimiza utilizasaun área no apoia preparasaun ba eventu boot sira.
Rezolusaun Governu ne’e kria mekanizmu koordenasaun interministeriál atu garante akompañamentu kontínuu ba projetu SKI, ne’ebé konsidera nu’udar inisiativa estratéjika ba dezenvolvimentu ekonómiku, promosaun turizmu no hadi’a kualidade urbana iha sidade Dili.
Komisaun ne’e iha natureza téknika no konsultiva, no organiza iha grupu traballu rua. Grupu dahuluk sei responsavel ba akompañamentu tékniku konstrusaun, inklui kontrolu kualidade no verifikasaun espesifikasaun obra nian. Grupu daruak sei fó atensaun ba koordenasaun interministeriál iha nível supervizaun, ho envolvimentu hosi ministériu no entidade públika relevante sira.
Entre funsaun prinsipál komisaun ne’e mak:
- Akompaña faze hotu projetu nian
- Koordena entre entidade sira ne’ebé envolve
- Monitoriza prazu, kustu no risku finanseiru
- Identifika dezafiu sira no propoin medidas korretivas
- Elabora relatóriu periódiku no hala’o avaliasaun regular ba progresu obra
Koordenasaun jerál ba komisaun ne’e sei lidera hosi Vise-Primeiru-Ministru, ho apoiu tékniku, administrativu no lojístiku hosi ninia gabinete, atu garante implementasaun efikás no koerente ba projetu estratéjiku ida-ne’e.
Projetu Sentru Konvensaun Internasionál (SKI) espera bele kontribui signifikativamente ba dezenvolvimentu infraestruturál no kapasidade Timor-Leste atu organiza eventu internasionál iha futuru.