Díli, 23 Marsu 2026 — Ministério do Planeamentu no Investimentu Estratéjiku (MPIE), liuhusi Unidade Planeamentu Integradu (UPI), realiza workshop elaborasaun kona-ba preparasaun Plano Médiu Prazu (PMP) 2027–2030 iha Salaun Larigutu CNE. Atividade ida ne’e envolve reprezentante husi ministériu no ajénsia governamentál sira hodi diskute prioridade estratéjiku ba planeamentu dezenvolvimentu nasional iha tinan lima oin mai, nu’udar kontinuação husi workshop ne’ebé realiza iha 9 Marsu 2026.
Diskusaun Proposta no Validasaun Dokumentus Setorial
Iha abertura, Koordenadora Unidade Planeamentu Integradu, Sra. Epi Orleães, hato’o saudasaun no respeitu ba Sua Excelência Ministru MPIE, Diretor Geral, Diretor Nacional sira, no representante sira husi ministériu no ajénsia governamentál.
Iha nia intervensaun, Sra. Koordenadora esplika katak workshop ida ne’e hanesan kontinuação husi enkontru anterior, ne’ebé ekipa MPIE partilha ona proposta dokumentus planeamentu. Objetivu prinsipál hosi enkontru loron ida ne’e mak halo diskusaun kle’an kona-ba dokumentus sira ne’ebé apresenta ona, liuhusi avaliasaun relevánsia ba kada ministériu, nivel konkordánsia, no hato’o sugestaun alterasaun ne’ebé nesesáriu.
Pontu diskusaun prinsipál sira inklui rezultadu no desafiu setorial, objetivu estratéjiku, no intervensaun estratéjiku. Partisipante sira mos husu atu halo konsultasaun iha nivel ministerial no hato’o kontribuisaun konkretu hodi asegura dokumentus sira reflete nesesidade real setor sira.
Mekanismu no Estrutura Koordenasaun
Workshop ne’e bazeia ba Rezolusaun Governu Nº 43/2024, ne’ebé define estrutura koordenasaun ba planeamentu integradu. Estrutura refere inklui:
- Setor Infraestrutura no Desenvolvimentu Institusional, koordenadu husi MPIE
- Setor Sosial, lidera husi Vice-Primeiro-Ministru II
- Setor Ekonómiku, lidera husi Vice-Primeiro-Ministru I
Durante prosesu preparasaun, MPIE mos realiza ona enkontru setorial ho entidade relevante sira hanesan MCAE (setor ekonómiku), PCM (desenvolvimentu institusional), no VPM II (setor sosial), no kontinua fó apoiu tékniku ba ministériu sira.
Output Esperadu no Próximu Etapa
Husi workshop ida ne’e espera atu hetan konsensu inicial kona-ba rezultadu no desafiu setorial, objetivu estratéjiku, no intervensaun estratéjiku, inklui mos sugestaun alterasaun husi ministériu sira.
Etapa tuir mai sei foka ba diskusaun detallu kona-ba baseline, indikator sira, no metas (targets) atu asegura implementasaun ne’ebé mensurável no efetivu.
Mensajen husi Sua Excelência Ministru MPIE
Iha nia mensajen, Sua Excelência Ministru MPIE hato’o agradese ba partisipante sira ba sira-nia partisipasaun ativa iha prosesu konsulta Plano Médiu Prazu 2027–2030.
Ministru sublinha katak dokumentu planeamentu ne’e sei apresenta ba Konsellu Ministrus atu hetan aprovasaun ofisial, no salienta importánsia planeamentu integradu no koordenasaun entre setor sira, liuliu setor ekonómiku, infraestrutura, sosial, no desenvolvimentu institusional.
Objetivu final hosi planu ne’e mak atu alinha planu setorial sira ho meta nasional to’o tinan 2030, hodi asegura efisiénsia no impaktu real ba dezenvolvimentu nasional.
Konkluzaun
Workshop ida ne’e sai hanesan etapa importante iha prosesu finalizasaun Plano Médiu Prazu 2027–2030, ne’ebé foka ba validasaun no diskusaun dokumentus setorial. Partisipasaun ativa husi ministériu sira konsidera fundamental atu garante susesu implementasaun planu iha futuru.