Díli, Loron 22 fulan Outubru tinan 2025.
Ministru Planeamentu no Investimentu Estratéjiku, Eng. Gastão Francisco de Sousa, akompaña hosi Assor Prinsipal, Júlio Tomás Pinto, hala’o enkontru ho Sua Exelénsia Prezidente Repúblika, Dr. José Ramos-Horta, hodi informa kona-ba politika IX Governu Konstitusionál atu hari’i Banku Nasionál Dezenvolvimentu Timor-Leste (BNDTL), ne’ebé sei kolabora ho Governu Brazil.
Durante aprezentasaun ne’e, Prezidente Ramos-Horta agradese ba Governu no promete katak bainhira nia hala’o vizita ba Malázia atu partisipa iha serimónia ofisiál Adezaun Timor-Leste sai membru ASEAN iha loron 26 Outubru 2025, nia sei hasoru no ko’alia diretamente kona-ba asuntu ida-ne’e ho Prezidente Repúblika Federativa Brazil, Luiz Inácio Lula da Silva.
Prezidente Ramos-Horta konsidera politika Governu atu estabelese Banku Dezenvolvimentu Nasionál hanesan inisiativa importante tebes ba dezenvolvimentu ekonómiku no reforça sistema bankáriu iha Timor-Leste.
Politika IX Governu nian objetivu mak atu hari’i Banku Nasionál Dezenvolvimentu Timor-Leste (BNDTL) hanesan instrumentu estratéjiku ida atu sustenta dezenvolvimentu ekonómiku nasaun nian.
Inisiativa ida-ne’e sei fó prioridade ba investimentu sira ne’ebé transforma setór agrikultura, turizmu, indústria no abitasaun. Projetu ida-ne’e sei la’o liu hosi prosesu aprovasaun iha Konsellu Ministru no sei hetan suporta husi parseiru internasionál sira, hanesan Asian Development Bank (ADB).
Objetivu principal mak atu hari’i sistema finanseiru ne’ebé fó sustenta ba dezenvolvimentu ekonómiku ne’ebé sustentável no inkluzivu, hodi halo reforma iha sistema finanseiru anteriór ne’ebé la transparenti no la responsavel, no promove transformasaun nesesária ba dezenvolvimentu nasional.
BNDTL sei sai hanesan instrumentu estratéjiku importante atu habelar dezenvolvimentu nasaun nian, tuir prinsipiu dezenvolvimentu sustentável no inkluzivu.
(Média_MPIE)
Asesu ba ami nia Pajina Facebook. Klik iha ne’e