DILI, 28 Fevereiru 2025 – Ministériu Planeamentu no Investimentu Estratéjiku (MPIE) lansa planu estratéjiku ba períodu 2025-2029 no website foun ne’ebé marka pasu importante ida iha jornada dezenvolvimentu sustentavel no inkluzivu.
Planu estratéjiku 2025-2029 nu’udar roteiru kompriensivu ida ne’ebé dezenvolve liuhusi konsulta estensivu hodi defini no hatuur prioridade no estratejia prinsipál ba tinan lima oin mai.
Ministru Planeamentu no Investimentu Estratéjiku, Eng. Gastão Francisco de Sousa, informa planu estratéjiku 2025-2029 foku ba área estratéjika haat mak hanesan ordenamentu territóriu, planeamentu integradu no investimentu estratéjiku, dezenvolvimentu infraestrutura, no dezenvolvimentu institusionál, ho objetivu atu dudu kreximentu sosiuekonómiku transformativu no hadi’a kualidade moris sidadaun hotu-hotu.
Liu husi diskursu Eng. Gastão Francisco de Sousa fo sai katak planu ida-ne’e nu’udar planu estratéjiku dahuluk ne’ebé MPIE elabora hodi reprezenta Ministériu nia kompromisu iha dezenvolvimentu setór infraestrutura hodi asegura planeamentu integradu no investimentu estratéjiku hodi aselera kreximentu ekonómiku ida sustentavel no inovadór hodi kria futuru ida ne’ebé prósperu ba Timor-Leste.
Vizaun MPIE nian hatuur bazeia ba vizaun globál husi Planu Estratéjiku Dezenvolvimentu 2011-2030 no énfaze importánsia ba planu estratéjiku ne’ebé ajuda hatuur vizaun ida klara no estratejia sira adekuada atu gia implementasaun programa sira hodi responde ba dezafiu dezenvolvimentu nasionál no globál, inklui mós kapitaliza oportunidade sira hodi mitiga risku husi impaktu globál hanesan polítika no mudansa klimátika.
“Panorama globál hatudu mudansa ida ne’ebé lais tebes tanba ne’e mak importante tebes atu elabora planu estratéjiku nu’udar dokumentu estratéjiku ida hodi gia ministériu responde ba demanda dezenvolvimentu nomós mitigasaun ba risku, liuliu atu orienta Governu hodi responde ba tendénsia globál no situasaun inserteza iha futuru ho reziliénsia no estratéjika”.
S.E Ministru MPIE Eng. Gastão Francisco de Sousa, esplika mos katak planu estratéjiku ida-ne’e hatuur objetivu prinsipál hirak mak hanesan. dezenvolvimentu territóriu ida ekilibru, integradu no sustentavel hodi hasa’e kualidade moris ema nian inklui defeza no valoriza patrimóniu kulturál no naturál.
Aleinde ne’e, dezenvolve enkuadramentu planeamentu integradu ba médiu no longu prazu hodi kontribui ba kreximentu sosioekonómiku. Nomós mellora no promove ambiente investimentu ida amigavel no seguru hodi atrai investór nasionál no internasionál investe iha setór produtivu no estratėjiku sira. Hadiak kualidade infraestrutura públika hodi kontribui ba kreximentu sosioekonómiku.