Dili- 28/04/2025, Ministériu Planeamentu no Investimentu Estratéjiku (MPIE) liu husi Unidade Planeamentu Integradu (UPI) partisipa iha sorumutu Quarterly Development Partners Meeting (QDPM sigla Inglés) ne’ebé realiza iha salaun Auditóriu Kay Rala Xanana Gusmão Pizo 1, Ministériu Finansas Aitarak Laran.
Objetivu husi sorumutu ne’e mak atu revitaliza rezolusaun Governu nú. 43/2024 kona-ba kriasaun Komisaun Koordenasaun Dezenvolvimentu Setorial Inter-Ministerial (ISDCC sigla Inglés), liuhusi estabelesimentu enkuadramentu rezultadu komún ida-ne’ebé klaru no ba tempu naruk, fornese apoiu ba estratéjia dezenvolvimentu no preparasaun planu dezenvolvimentu setoral nian iha kolaborasaun ho parseiru dezenvolvimentu sira, inklui identifika risku no dezafiu sira, nune’e mós define no prioritiza liña asaun sira iha setór dezenvolvimentu sira tuir idak-idak nia responsabilidade, ho maneira efisiente no koordenada, hodi asegura aliñeamentu institusionál ho parseiru dezenvolvimentu sira. Objetivu seluk mak atu haree ba enkuadramentu parseria ne’ebé eziste no esplora aprosimasaun inovativu sira ba dezenvolvimentu kooperasaun ne’ebé di’ak liu.
Iha reuniaun ne’e Vise-Ministra Finansas Felicia de Carvalho hateten, enkontru refere hetan orientasaun direta husi Primeiru Ministru Kayrala Xanana Gusmão hodi haree no halo avaliasaun ba implementasaun Planu, Programa no Progresu husi Liñas Ministeriais sira iha primeiru trimestre.
Aleinde ne’e, Koordenadra Unidade Planeamentu Integradu (UPI) Sra. Epi Orleães hato’o aprezentasaun kona-ba progresu implementasaun setór infraestrutura, dezafius, nomos área estratéjiku ne’ebe mak presiza kolaborasaun husi parseiru dezenvolvimentu sira mak hanesan Estrada, Bee no Eletrisidade; Transporte no Komunikasaun, Dezenvolvimentu lokal, Planeamentu no Investimentu Estratejiku no Dezenvolvimentu Rekursu Humanus iha Setór Infraestrutura liu husi Formasaun iha área tékniku espesializadas.
Durante sorumutu ne’e, parseiru dezenvolvimentu sira mós afirma hikas sira nia apoiu no hato’o apresiasaun ba governu nia esforsu atu hasa’e transparénsia, haforsa kuadru monitorizasaun, no hadi’a efetividade koordenasaun.
Sorumutu Parseiru Dezenvolvimentu trimestrál ne’e sai hanesan oportunidade ida ba Komisaun Koordenasaun Inter-Ministrerial IMCCS ne’ebé diskute ho Parseiru Dezenvolvimentu Governu nian. Espera katak sei loke dalan ba estabelesimentu Kuadru Rezultadu Komún ida-ne’ebé klaru no ba tempu naruk. Rezultadu sira husi QDPM sei aprezenta iha Sorumutu Parseiru Dezenvolvimentu Timor-Leste nian QDPM ne’ebé sei realiza iha loron 9-10 Juñu 2025.
Entretantu, sorumutu ne’e marka prezensa husi Vise-Primeiru Ministru, Ministru Koordenadór Asuntu Ekonómiku no Ministru Turismu no Ambiente; Vise-Primeiru Ministru, Ministru Koordenadór Asuntu Sosial no Ministru Dezenvolvimentu Rural no Habitasaun Komunitária, membru Governu, Liña Ministeriais sira kompostu husi Diretores Gerál no Diretores Nasional sira inklui mos parseiru Dezenvolvimentu sira iha Timor-Leste. (Remata)