Díli, 24 Juñu 2026 – Ministériu Planeamentu no Investimentu Estratéjiku (MPIE), liuhosi Unidade Planeamentu Integradu (UPI), hahú oficialmente Konsultasaun Téknika kona-ba Esbosu Preliminár Planu Médiu Prazu Governu (PMP) 2027–2030. Enkontru ida-ne’e realiza iha Díli no envolve reprezentante husi ministériu setoriál sira, instituisaun governamentál no tékniku planeamentu husi IX Governu Konstitusionál.
Iha sesaun abertura, Ministru Planeamentu no Investimentu Estratéjiku, S.E. Gastão Francisco de Sousa, reafirma katak prosesu konsultativu ida-ne’e importante atu asegura PMP 2027–2030 sai dokumentu planeamentu ne’ebé forte, inkluzivu no alinha ho prioridade dezenvolvimentu nasionál sira.
Koordenadora Unidade Planeamentu Integradu (UPI), Sra. Epi Orleães, aprezenta progresu elaborasaun esbosu preliminár PMP 2027–2030 no esplika importánsia kontribuisaun husi ministériu no instituisaun relevante sira atu asegura dokumentu planeamentu ida-ne’e reflete nesesidade no prioridade dezenvolvimentu nasionál.
Durante loron dahuluk, diskusaun sira fó énfaze ba Setór Infraestrutura, ne’ebé envolve aprezentasaun husi pontu fokál setoriál sira, intervensaun husi Diretor-Jerál Programa husi ministériu relevante sira, no prosesu validasaun no atualizasaun ba dadus dezenvolvimentu infraestrutura nian. Partisipante sira halo análize kona-ba progresu, dezafiu no oportunidade sira atu suporta dezenvolvimentu sustentável iha Timor-Leste.
Iha loron hanesan, workshop kontinua ho diskusaun kona-ba Setór Dezenvolvimentu Institusionál, ne’ebé aborda kapasidade institusionál, governasaun públika no mekanizmu implementasaun polítika sira. Sesaun ida-ne’e permite ministériu no instituisaun sira kontribui diretamente ba validasaun informasaun no indikadór estratéjiku ne’ebé sei integra iha dokumentu final PMP.
Konsulta téknika ida-ne’e sei kontinua iha loron daruak ho diskusaun ba setór prioritáriu sira seluk, antes dokumentu final prepara atu submete ba konsiderasaun no aprovasaun Governu.
Fim
===============
Tags: MPIE, UPI, PMP 2027–2030, Konsulta Téknika, Planeamentu Nasionál, Infraestrutura, Dezenvolvimentu Institusionál, Timor-Leste.