DILI, 21 Abríl 2026 – Ministru Planeamentu no Investimentu Estratéziku (MPIE), Gastão Francisco de Sousa, partisipa iha serimónia inaugurasaun edifísiu foun Asian Development Bank (ADB) iha área Farol, Dili.
Partisipasaun MPIE nian reflete papél ministériu ne’e hanesan entidade tutelar ba investimentu estratéziku, ho objetivu atu kontinua hametin relasaun amizade no konfiansa entre ADB no Estadu Timor-Leste, hodi suporta kresimentu ekonomia liu husi programa sira ne’ebé finansia husi ADB.
ADB nia prezensa iha Timor-Leste hatudu komitmentu forte atu ajuda governu promove dezenvolvimentu sustentável tuir padrãu mundiál hanesan Sustainable Development Goals 2030.
Prezidente Repúblika Prezide Serimónia
Serimónia inaugurasaun ne’e prezide husi Prezidente Repúblika, José Ramos-Horta, no marka progresu importante iha área instituisionál no dezenvolvimentu infraestrutura iha país.
iha ninia intervensaun, Prezidente Ramos-Horta elojia ADB nu’udar:
“banku ida ne’ebé úniku tebes, ne’ebé fó prióridade ba servisu ba povu no nasaun duké buka lukru de’it.”
Xefe Estadu mós destaca relasaun parseiria entre Timor-Leste no ADB ne’ebé dura ona tinan barak, ho kontribuisaun krítiku iha área infraestrutura no apoiu ba preparasaun Timor-Leste atu adeze ba ASEAN.
Maske serimónia ne’e marka progresu importante, eventu ne’e mós envolvida iha atmosfera luto nasionál.
Hafoin simu notísia trájiku kona-ba falesimentu Ministru Ensinu Superiór, Siénsia no Kultura, José Honorio da Costa Pereira Jerónimo, ne’ebé sofre atake kardiaku iha fatin servisu iha dadeer ne’e, serimónia hahú ho orasaun koletiva no momentu silénsiu.
Prezidente Repúblika hamutuk ho membru Governu no korpu diplomátiku fó onra ba memória no dedikasaun servisu saudozu Ministru nian.
Mensajen Kondolénsia no Refleksaun Nasionál
Hafoin inaugurasaun, Prezidente Ramos-Horta ko’alia ba jornalista sira hodi espreza tristeza kle’an ba lakon ne’e.
Nia hato’o kondolénsia ba família no povu Timor-Leste, ho liafuan katak nasaun lakon ona lider ida ne’ebé importante no dedikadu tebes ba servisu públiku.
Maski inaugurasaun edifísiu foun ADB reprezenta pasu boot ida ba dezenvolvimentu futuru, Prezidente enfatiza katak governu hela iha luto ba kolega ida ne’ebé mate iha knaar laran hodi serbi ninia rain.