OEKUSI, 20 Abríl 2026 – Ministru Planeamentu no Investimentu Estratéjiku (MPIE), ne’ebé mós Prezidente Konsellu Administrasaun Fundu Infraestrutura (KAFI), S.E. Gastão Francisco de Sousa, lidera reuniaun daruak KAFI iha Rejiaun Administrativa Espesiál Oekusi Ambeno (RAEOA), no konsege aprova projetu emerjénsia hamutuk 30 resin.
Reuniaun ne’e realiza iha Salaun Konvensaun Palaban Oekusi no foka liu ba autorizasaun despeza ba projetu prioritáriu sira, liu-liu iha área saúde, edukasaun no infraestrutura públika.
“Reuniaun KAFI ne’e atu aprova autorizasaun despeza ba projetu saúde, Ministériu Ensinu Superiór, MOP no projetu seluk ne’ebé Primeiru-Ministru identifika hanesan presiza urjente iha nível lokal,” hateten S.E. Gastão Francisco de Sousa ba jornalista sira.
Projetu Prinsipál ne’ebé Aprovadu
Iha reuniaun ne’e, governu aprova projetu importante balun iha Oekusi, inklui:
- Reabilitasaun Monumentu Lifau
- Dezenvolvimentu Jardín Oébau
- Protesaun morru iha Ponte Noefefan
- Projetu saúde hamutuk 24
- Projetu sira ne’ebé presiza re-dezeñu (3 projetu)
- Projetu irigasaun Karau-Ulun
Ministru esplika katak projetu balun ne’ebé liu tiha ona prosesu konkursu públiku mós hetan aprovasaun, nune’e entidade relevante sira bele kontinua ho asinatura kontratu no implementasaun obra.
“Depois de aprovasaun, entidade judikál sira bele asina kontratu no hala’o obra sira. Ohin laiha desizaun ba projetu foun,” nia afirma.
Projetu Nasionál Seluk
Além de projetu iha Oekusi, reuniaun ne’e mós aborda projetu nasionál sira hanesan:
- Konstrusaun Institutu Politéknika Betanu (IPB)
- Estrada husi Oéleu ba Lolotoe (Munisípiu Bobonaru)
- Projetu postu saúde no infraestrutura seluk
Partisipasaun Membru KAFI
Reuniaun ne’e envolve membru KAFI husi instituisaun importante sira, inklui:
- Ministériu Ensinu Superiór, Siénsia no Kultura (MESSK)
- Ministériu Saúde
- Ministériu Obra Públika (MOP)
- Ajénsia Dezenvolvimentu Nasionál (ADN, I.P.)
- Autoridade Nasionál Komunikasaun (ANC)
Ministru Transporte no Komunikasaun, Miguel Manetelo, nu’udar membru KAFI, konsidera aprovasaun projetu 30 resin ne’e hanesan pasu importante atu responde nesesidade urjente komunidade.
#Media MPIE#