DILI, 18 Marsu 2026 — Sua Exelénsia Ministru Planeamentu no Investimentu Estratéjiku (MPIE), Eng. Gastão Francisco de Sousa, partisipa iha sorumutu Konsellu Ministrus ne’ebé lideradu hosi Sua Exelénsia Primeiru-Ministru, Kay Rala Xanana Gusmão, iha Palásiu Governu, Dili.
Iha sorumutu ne’e, Governu analiza konkluzaun hosi auditoria forense ne’ebé realiza hosi EY Portugal kona-ba prosesu akizisaun no jestaun aviaun Twin Otter, no mós konstrusaun ró Haksolok, ne’ebé implementa hosi Autoridade Rejiaun Administrativa Espesiál Oekusi Ambenu (RAEOA).
EY Portugal, nu’udar parte hosi rede internasionál Ernst & Young, iha esperiénsia boot iha área auditoria ba entidade públika no privada. Durante aprezentasaun, relatóriu ne’e deskreve prosesu akizisaun, jestaun no konstrusaun projetu sira ne’ebé temi ona, no mós hato’o konkluzaun prinsipál hosi auditoria forense.
Iha parte seluk, Vise-Ministra ba Asuntu ASEAN halo aprezentasaun kona-ba kalendáriu reuniaun ASEAN nian ne’ebé Timor-Leste sei partisipa iha fulan Marsu no Abríl tinan 2026.
Apresentasaun ne’e subliña objetivu prinsipál hosi partisipasaun Timor-Leste, inklui reforsu kooperasaun rejionál, hametin parseria estratéjika no konsolidasaun prezensa nasaun iha mekanizmu koordenasaun polítika, ekonómika no seguransa iha ASEAN.
Iha sorumutu ne’e, Konsellu Ministrus mós delibera no aprova proposta hosi Ministra Edukasaun, Dulce de Jesus Soares, kona-ba tema ba Reuniaun Ministrus Edukasaun Komunidade País Lian Portugés (CPLP), mak: “Edukasaun, valór demokrátiku sira no partisipasaun sívika: dalan sira atu hametin sosiedades CPLP.”
Reuniaun ne’e sei realiza iha Dili iha loron 7 fulan Maiu tinan 2026, no sei sai hanesan plataforma importante atu reforsa kooperasaun iha área edukasaun entre Estadu-membru CPLP sira, aliña pozisaun iha fórum internasionál no akompaña implementasaun inisiativa konjunta sira.
Sorumutu Konsellu Ministrus ne’e reflete komitmentu Governu atu asegura boa governasaun, transparénsia iha jestaun públika no reforsu relasaun internasionál iha nível rejionál no global.
REMATA