Dili, 10 Fevereiru 2026 – Primeiru-Ministru, Kay Rala Xanana Gusmão, halo vizita surpresa ba Ministériu Planeamentu no Investimentu Estratéjiku (MPIE) no hala’o enkontru ho S.E. Ministru Planeamentu no Investimentu Estratéjiku, Eng. Gastão Francisco de Sousa.
Enkontru ne’e mós hetan akompañamentu hosi Asesór Prinsipal, Júlio Tomás Pinto, hodi diskute kona-ba progresu servisu no prioridade sira ne’ebé MPIE hala’o iha área planeamentu no dezenvolvimentu nasaun.
Iha okaziaun ne’e, Primeiru-Ministru hateten katak MPIE iha papél importante tebes iha konsesaun, koordenasaun no avaliasaun polítika sira ne’ebé Konsellu Ministrus aprova ona, liu-liu iha promosaun dezenvolvimentu ekonómiku no sosiál Timor-Leste nian, liu hosi planeamentu estratéjiku integradu no jestaun rekursu finanseiru ne’ebé efisiente.
MPIE mós iha responsabilidade direta ba implementasaun Planu Estratéjiku Dezenvolvimentu, liu-liu iha área infraestruturas, planeamentu urbanu no ordenamentu territóriu.
Durante enkontru ne’e, Xefe Governu desafia MPIE atu kontinua fortifika servisu instituisaun nian, liu-liu iha planeamentu, proposta no koordenasaun ezekusaun infraestruturas estratéjiku sira ba dezenvolvimentu nasaun.
Além ne’e, MPIE iha kompeténsia atu superviziona kualidade servisu no atividade sira relasiona ho ezekusaun projetu fízikus ne’ebé finansia hosi Fundu Infraestruturas no mekanismu finansiamentu seluk, inklui projetu sira hosi Diresaun Nasionál Parseria Públiku-Privada iha Ministériu Finansas. Fundu sira ne’e foka atu garante finansiamentu ba projetu estratéjiku plurianuál sira.