Jakarta, 10 Outubru 2024 – Ohin Governu Repúblika Demokrátika Timor-Leste, reprezenta husi Ministru Planeamentu no Investimentu Estratéjiku, asina Memorandu Entendimentu (MoU) ida ho Ministru Planeamentu Dezenvolvimentu Nasionál/Ajénsia Planeamentu Dezenvolvimentu Nasionál (Bappenas sigla Indonézia) Repúblika Indonézia nian kona-ba kooperasaun dezenvolvimentu.
MoU ne’ebé asina husi Señor Ministru Gastão Francisco de Sousa no Señor Ministru Suharso Monoarfa, estabelese enkuadramentu ida ba kolaborasaun kona-bá aspetu oioin dezenvolvimentu nian hodi alkansa prioridade dezenvolvimentu nasionál nasaun rua nian no metas global objetivu dezenvolvimentu sustentável sira hanesan infraestrutura, kapitál umanu, ekonomia no dezenvolvimentu sustentável. Ámbitu kooperasaun nian kobre transporte, enérjia mós, edukasaun no formasaun profisionál, komérsiu no investimentu, mitigasaun ba mudansa klimátika, no transformasaun dijitál.
“Indonézia ho Timor-Leste iha relasaun besik tebes iha aspetu oioin, tantu iha istória, ekonomia no kultura, ne’ebé hametin relasaun entre nasaun rua ne’e espesiál tebes. Kooperasaun ne’e bazeia ba prinsípiu igualdade, respeitu malu no benefísiu mútua. Ami fiar katak ho servisu hamutuk, ita bele atinji ita ida-idak ninia prioridade dezenvolvimentu ho efetivu no inkluzivu. Ami hein katak liu husi kooperasaun iha infraestrutura, enérjia mós, dezenvolvimentu sustentável, no setór sira seluk, ita bele kria impaktu ida ne’ebé loos no sei sente husi povu nasaun rua nian. Hein katak kolaborasaun ne’e sei buras nafatin no fó benefísiu ne’ebé boot liu ba progresu ita-nia nasaun nian” dehan Señor Ministru Gastão de Sousa.
Ministru rua ne’e subliña importánsia husi kooperasaun ba dezenvolvimentu sustentável bazeia ba prinsípiu respeitu mútua no benefísiu sira ne’ebé fahe, no loke oportunidade sira ba kolaborasaun kona-bá troka informasaun, koñesimentu espesializadu no fahe prátika di’ak sira.
“MoU ne’e sei sai enkuadramentu ida ba kooperasaun estratéjiku dezenvolvimentu nian ba nasaun rua ne’e hodi fó apoiu ba atinjimentu ba prioridade no alvu dezenvolvimentu nian tuir prioridade dezenvolvimentu iha nasaun rua ne’e, liu-liu iha alkansa objetivu Dezenvolvimentu Sustentável (ODS). Iha MoU, nasaun rua ne’e loke espasu ba kolaborasaun/kooperasaun dezenvolvimentu iha setór oioin, iha forma oioin hanesan, troka informasaun no fahe esperiénsia kona-bá mellor prátika, kapasitasaun, kooperasaun téknika, no kooperasaun peskiza nian” dehan Ministru Suharso Monoarfa.
Asinatura MoU ne’e marka pasu signifikativu iha aprofundamentu relasaun bilaterál entre Timor-Leste no Indonézia. Hein katak sei kontribui ba dezenvolvimentu ekonómiku, progresu sosiál, no moris-di’ak nasaun rua nian.
MPIE 2024