Dili, 12 Janeiru 2023,
Centru Planeamentu Integradu (CPI), Ministériu Planu no Ordenamentu (MPO) iha loron 12 fulan Janeiru tinan 2023, organiza workshop tékniku kona-ba proposta ba médida estrátejika, enkuadramentu rezultadu no planu operasionál ba Pilar 3 “Dezenvolvimentu Urbanu e Rural Ekilibradu” husi Planu Estratéjika Dezenvolvimentu-Reajustadu (PED-R 2023-2038).
Parte dahuluk husi workshop ne’e maka aprezentasaun husi Ajensia Nasionál Planu Monitorizasaun no Avaliasaun (ANAPMA) kona-ba rejultadu avaliasaun ba PED 2011-2030, husi avaliadór Independente. Parte daru’ak aprezentasaun husi Centru Planeamentu Integradu, kona-ba “médida estratéjika, enkuadramentu rejultadu no planu operasionál” husi PED-R 2023-238. No iha parte datolu, halibur opiniaun husi tékniku, péritu, diretur jerais, diretur nasionais, husi ministériu no ajénsia autónomu sira.
Vise-Primeiru-Ministru no Ministru Planu no Ordenamentu, Eng. José Maria dos Reis, iha nia intervensaun haktuir katak workshop refere ho objetivu defini medida estratéjika, enkuadramentu rejultadu no planu operasionál sira hodi bele orienta implementasaun PED Reajustadu di’ak liu.
Workshop Tékniku loron datoluk halibur diretur jerál, diretur nasionál, tékniku, asesór, péritu husi Ministériu Obras Públika, Ministériu Justisa, Ministériu Administrasaun Estatál, Ministériu Planu e Ordenamentu, no Institutu Públiku no Ajénsia autónomu sira hanesan, ANE.I.P, no ANAS.I.P,
Workshop Tékniku kona-ba Proposta “Medida Estratéjika, Enkuadramentu Rezultadu no Planu Operasionál husi Planu Estratéjiku Dezenvolovimentu 2023-2038” hala’o ba pilar lima husi Planu Estratéjiku Dezenvolvimentu – Reajustadu 2023-2038. Workshop ba Pilar IV “Konetividade no Vantajen Komparativu sei hala’o iha loron 13 fulan Janeiru 2023. Workshop ba pilar V “Paz, Justisa no Instituisaun Forte” sei halao iha loron 16 fulan Janeiru tinan 2023. Workshop ba Pilar I, II no III halo ona iha 9, 10, 11 fulan Janeiru 2023. ***