MINISTRU
Eng. Gastão Francisco de Sousa (moris iha 25 Marsu 1960) hanesan polítiku no enjeñeiru seniór. Nu’udár eis-Ministru Obras Públikas (iha Governu Konstitusionál dalimak nian ba períodu 2012 – 2015) ne’ebé lidera husi Kay Rala Xanana Gusmão no Eis-Minstru Obras Públikas, Transporte no Komunikasaun (iha Governu Konstitusionál daneen nian ba periodu 2015 – 2017) ne’ebé lidera husi Dr. Rui Maria dé Araujo.
Iha 1995, Eng. Gastão graduadu husi Universidade Kristaun Satya Wacana, Salatiga, Indonesia, ho lisensiatura iha Enjenaria ne’ebé espesializadu iha Elektrónika. Bainhira remata tiha ninia estudu superiór, Eng. Gastão kontinua servisu fali ho Pemerintah Daerah Tingkat Satu (1), Governu Lokál (iha Divizaun Planeamentu no Dezenvolvimentu) to’o Referendu iha 1999.
Entre tinan 2000 no 2005, Eng. Gastão kaer pozisaun no esperiénsia servisu oi-oin. Eng. Gastão kontribui ninia kapasidade espesializadu iha área IT no komunikasaun nian bainhira servisu hamutuk ho Administrasaun Tranzitóriu Timor-Leste (ETTA). Nia mós servisu hamutuk ho eis Ministra Finansas, Sra. Emilia Pires hodi fó asisténsia téknika ba Ajénsia Nasionál Planeamentu no Dezenvolvimentu (NPDA). Tuir mai nia hetan promosaun nu’udár Diretór Nasionál ba Planeamentu no Koordenasaun Asisténsia Esterna (NDPEAC) iha Ministériu Finansas nian. Aleinde ne’e, nia hanesan dosente ida ba Fakuldade Enjenaria iha Universidade Nasionál Timor Lorosa’e (UNTL).
Iha 2005, Eng. Gastão kontinua tama iha setór privadu – Timor Telecom nu’udár Xefe Diretór Komersiál no Komersál to’o 2009. Depois ne’e, iha tinan 2009, Eng. Gastão dala ida tan, foti oportunidade seluk hodi servi fila-fali governu hala’o misaun iha nível rejionál – reprezentante Governu nian ba Banku Dezenvolvimentu Aziátiku (ADB) iha Manila, Filipina to’o fulan Jullu tinan 2012.
Hahú husi tinan 2012, Eng. Gastão ativamente envolve-an iha polítika no kaer knár nu’udár Ministru ba dezenvolvimentu Timor-Leste.
Kna’ar no Responsabilidade Prinsipál Ministru Planeamentu no Investimentu Estratéjiku Nian
Ministru Planeamentu no Investimentu Estratéjiku mak responsavel ba konsesaun, koordenasaun no avaliasaun ba polítika ne’ebé Konsellu Ministrus define no aprova ona, ba área promosaun dezenvolvimentu ekonómiku no sosiál nasaun nian, liuhusi planeamentu estratéjiku no integradu no rasionalizasaun rekursu finanseirus ne’ebé disponivel, hodi asume responsabilidade espesífika sira kona-ba implementasaun Planu Estratéjiku Dezenvolvimentu, liuliu kona-ba Infraestruturas no Planeamentu Urbanu, nomos Planeamentu no Ordenamentu Territóriu.
Ministru Planeamentu no Investimentu Estratéjiku nia kompeténsia mak atu planeia, propoin no koordena ezekusaun infraestruturas ne’ebé mak estratéjiku.
Ministru Planeamentu no Investimentu Estratejiku nia kompeténsia mós atu superviziona ba kualidade servisu no atividades ba ezekusaun projetus fízikus ne’ebé promove, dezenvolve ka finansia ona husi Fundu Infraestruturas ka sira seluk, ne’ebé ninia objetivu ka atribuisaun sira maka finansiamentu ba projetu estratéjiku plurianuál no husi Diresaun Nasionál Parseria Públiku-Privadas Ministériu Finansas nian.
Ministru Planeamentu no Investimentu Estratéjiku iha mós responsabilidade atu avalia projetus kapitál dezenvolvimentu, ne’ebé bazeia ba análize kriterioza hosi viabilidade projetus no kustu-benefísiu ida-idak; superviziona, fiskaliza no sertifika implementasaun no ezekusaun projetus, hodi kontribui ba rasionalizasaun rekursus finanseirus ne’ebé iha no ba dezenvolvimentu ekonómiku no atividade ekonómika, iha nivel nasionál, munisipál ka lokál; planeia no kontrola kustu no kualidade projetus kapitál dezenvolvimentu nian; promove transparénsia no kualidade liuhusi prestasaun servisus aprovizionamentu ba projetus kapitál dezenvolvimentu; dezenvolve estudus, paresér no análize téknika no setoriál sira ho objetivu atu avalia impaktu no viabilidade ekonómika hosi projetus dezenvolvimentu; analiza no selesiona propostas investimentu ba nasaun ne’e; estuda, planeia no propoin polítika ba dezenvolvimentu setoriál; estuda, planeia no propoin polítika nasionál ba ordenamentu territóriu, iha koordenasaun ho departamentu governamentál kompetente sira kona-ba matéria ne’e; ajuda hodi promove adosaun ba norma téknika no regulamentasaun kona-ba material sira ne’ebé utiliza iha konstrusaun sivíl, no mós dezenvolve testes laboratorial hodi garante seguransa ba edifísiu sira; apoia hodi dezenvolve kuadru legál no regulamentár ba atividade sira ne’ebé relasiona ho rekursus enerjétikus renováveis;; apoia iha estudus kona-ba kapasidade rekursus enerjétiku renovável no enerjia alternativa sira; mantein arkivu informasaun ida kona-ba operasaun no rekursus enerjétikus renováveis; kontribui hodi dezenvolve polítika nasionál transportes no komunikasoins nian; ajuda hodi prepara no dezenvolve, iha kooperasaun ho serbisu públiku sira seluk, implementasaun ba planu rodoviariu territóriu nasionál; apoia koordenasaun no promosaun ba sistema ida kona-ba jestaun no manutensaun nomos modernizasaun infraestruturas aeroportuárias, navegasaun aérea, estrada, dalan, portuárias no servisu sira ne’ebé iha ligasaun; promove kriasaun Banku Dezenvolvimentu Nasionál, iha koordenasaun ho Ministru Koordenadór Asuntus Ekonómikus no ho Ministru Finansas; no estuda, planeia no implementa ordenamentu territóriu no polítika nasionál abitasaun, iha koordenasaun ho Ministérius kompetentes kona-ba matéria ne’e.
Servisu no organizmu sira tuirmai Ministru Planeamentu no Investimentu Estratéjiku maka sei tutela: Ajénsia Dezenvolvimentu Nasionál, I.P. (ADN), Sekretariadu Grande Projetu, Komisaun Nasionál Aprovizionamentu (KNA) no Sekretariadu Tékniku Fundu Dezenvolvimentu Kapitál Umanu.