Dili, 23 Jullu 2026 – Ministériu Planeamentu no Investimentu Estratéjiku (MPIE) realiza Workshop Disseminasaun Dekretu-Lei n.º 21/2011, loron 8 Juñu, kona-ba primeira alterasaun ba Dekretu-Lei n.º 40/2008, loron 29 Outubru, ne’ebé regula Rejime Lisensa no Faltas ba Trabalhador Administrasaun Públika, iha Salaun Comisaun Nasionál Eleisaun (CNE), Dili.
Serimónia abertura lidera husi Sua Exelénsia Ministru Planeamentu no Investimentu Estratéjiku (MPIE), Eng. Gastão Francisco de Sousa, hamutuk ho Komisáriu Portefóliu Disiplina Komisaun Funsaun Públika (CFP), Sr. Agapito da Conceição. Workshop ida-ne’e envolve kargu diresaun, xefia no funsionáriu MPIE, inklui mós instituisaun sira ne’ebé tutela ba MPIE.
Iha nia intervensaun, Komisáriu Agapito da Conceição agradese ba MPIE tanba fó oportunidade ba Komisaun Funsaun Públika (CFP) atu realiza disseminasaun kona-ba diploma legal refere. Nia esplika katak atividade ida-ne’e importante atu sistematiza koñesimentu kona-ba enkuadramentu legal, natureza no finalidade rejime lisensa no faltas, inklui falta justifikada, falta la justifikada, reforma jestaun rekursu umanu no prosedimentu disiplinár iha Administrasaun Públika.
Komisáriu mos hato’o dadus kona-ba prosesu disiplinár ne’ebé Komisaun Funsaun Públika rejista desde tinan 2010. To’o agora, total 2.467 prosesu disiplinár mak instaura ona, no maioria kazu sira konklui ona. Ba tinan 2026 de’it, durante períodu Janeiru to’o Jullu, rejista ona 80 prosesu disiplinár, husi ne’ebé 19 kazu remata ona no 61 kazu seluk sei iha fase instrusaun no desizaun.
Nia enfatiza katak koñesimentu kona-ba rejime lisensa no faltas labele limita de’it ba tékniku rekursu umanu, maibé tenke komprende husi dirijente, xefia no funsionáriu hotu-hotu, atu garante aplicasaun lei ho loos no proteje direitu no obrigasaun funsionáriu públiku sira.
Iha diskursu abertura, S.E. Ministru Planeamentu no Investimentu Estratéjiku, Eng. Gastão Francisco de Sousa, afirma katak disseminasaun ida-ne’e importante atu hasa’e komprensaun funsionáriu sira kona-ba sira-nia direitu no dever, hodi melhora prestasaun servisu públiku ho responsabilidade, integridade no disiplina.
Ministru mos apela ba kargu diresaun, xefia no funsionáriu husi MPIE no instituisaun sira ne’ebé tutela ba Ministériu atu partisipa ho seriedade husi hahú to’o remata, tanba koñesimentu legal ida-ne’e importante ba implementasaun boa governasaun no jestaun rekursu umanu ne’ebé profesional.
Workshop ne’e hetan apresentasaun hosi oradór sira husi Komisaun Funsaun Públika:
- Sr. Lourenço Barros Magno, Diretór Nasionál Étika, Disiplina no Prosedimentu Administrativu, apresenta matéria kona-ba Prosedimentu Disiplinár, Prevensaun Asédiu Seksuál no Prosedimentu Administrativu Disiplinár.
- Sr. Juvenal Baptista Mendonça, Xefe Departamentu Planeamentu Kuadru Pesoál Funsaun Públika, apresenta matéria kona-ba Rejime Lisensa no Faltas ba Trabalhador Administrasaun Públika.
Partisipa iha workshop ida-ne’e kargu diresaun, xefia no funsionáriu hosi MPIE no instituisaun sira ne’ebé tutela ba Ministériu, inklui Autoridade Dezenvolvimentu Nasionál (ADN, I.P.), Fundu Dezenvolvimentu Kapital Umanu (FDCH), Secretariadu Projetu Bo’ot (Secretariat for Major Projects) no Komisaun Nasionál Aprovisionamentu (CNA).
Realizasaun workshop ida-ne’e reflete kompromisu MPIE atu kontinua hametin kapasidade rekursu umanu, promove kultura servisu ne’ebé bazeia ba disiplina, responsabilidade no kumprimentu ba lei no regulamentu Administrasaun Públika, hodi hasa’e kualidade prestasaun servisu ba povu Timor-Leste.
(REMATA)
Dokumentasaun klik iha :
https://www.facebook.com/share/p/1DPYZsTXgh/