MACAU (REPÚBLIKA POPULÁR XINA), 10 JUÑU 2026
Sua Excelénsia Ministru Planeamentu, Investimentu no Estratéjiku (MPIE), Eng. Gastão Francisco de Sousa, partisipa iha serimónia asinatura Memorandum of Understanding (MoU) entre Fundo de Desenvolvimento do Capital Humano (FDCH) no Universidade de São José (USJ) Macau, iha Repúblika Populár Xina.
Objetivu husi MoU ida-ne’e mak fasilita estudante Timoroan sira atu bele kontinua sira-nia estudu hanesan bolseiru iha USJ Macau.
Ministru MPIE esplika katak Macau hanesan únika sidade iha Repúblika Populár Xina ne’ebé uza lian Portugés no lian Xineza hanesan lian ofisiál sira, no iha dinâmica dezenvolvimentu ne’ebé signifikativu tebes. Tanba ne’e, Macau sai fatin importante ida ba Timoroan sira atu aprende no aumenta sira-nia koñesimentu.
Durante dekada barak liubá, Macau mos sai hanesan ponte importante ida ne’ebé liga luta rezisténsia Timor-Leste nian ba libertasaun nasionál ho komunidade internasionál. Desde 1975, lider Timoroan balun, inklui saudozu Proklamadór Francisco Xavier do Amaral, hala’o sira-nia estudu iha Macau hanesan seminarista.
Ministru Gastão salienta tan katak kooperasaun ida-ne’e la’ós de’it kona-ba asisténsia téknika. Inisiativa ida-ne’e mos atu hakle’an relasaun histó rika ne’ebé iha ona durante tempu naruk entre Timor-Leste no Macau, no habelar relasaun ne’e ba jerasaun foun akademiku Timoroan sira.
Nune’e, Memorandum of Understanding ida-ne’e bele sai hanesan kapítulu foun ida iha amizade ne’ebé duradoura entre povu rua. Ministru husu atu estudante Timoroan sira aproveita oportunidade ida-ne’e atu tama liu husi odamatan ne’ebé loke ona, no husu atu povu Timor-Leste no Macau kontinua dezenvolve hamutuk iha área koñesimentu, kapasidade no respeitu mútuu.
MoU ne’e asina direta husi Sr. Júlio Aparício, Diretór Ezekutivu FDCH, no reprezentante Universidade de São José (USJ) Macau, ho akompañamentu husi Ministru MPIE, Eng. Gastão Francisco de Sousa. Serimónia ne’e realiza iha salaun auditóriu USJ Macau, iha loron 10 Juñu 2026.
Tuir planu implementasaun, hahú iha tinan 2027 sei implementa akordu sira ne’ebé kontempla iha MoU refere, hodi haruka estudante Timoroan sira hala’o sira-nia estudu iha USJ Macau liu husi programa bolseiru ne’ebé sei oferese husi FDCH, instituisaun ne’ebé tutela husi Ministériu Planeamentu, Investimentu no Estratéjiku.
Bolsa estudu sira ne’ebé sei oferese barak liu sei kobre área siénsia no teknolójia, agrikultura, saúde no enjiñaria, tuir akordu ne’ebé estabelese entre parte sira.
Universidade de São José (USJ) hanesan universidade privada ida ne’ebé harii husi Igreja Katólika, liu husi Diocese Macau, iha Rejiaun Administrativa Espesiál Macau, iha tinan 1996, ho apoiu husi Universidade Católica Portuguesa.
(REMATA)
MPIE