Díli, 30 Marsu 2026 — Iha enkontru híbridu ida ne’ebé envolve reprezentante husi ministériu no parseiru relevante sira, membru grupo trabalho sira halo atualizasaun kona-ba progresu implementasaun Roteiru Nasionál Dezenvolvimentu Merkadu Abitasaun, ne’ebé aprova ona husi Konsellu Ministrus iha 10 Dezembru 2025. Reuniaun ne’e nia objetivu mak atu asegura kontinuidade no reforsa koordenasaun servisu hodi garante implementasaun ne’ebé efetivu.
Iha diskusaun ne’e, partisipante sira enfatiza katak aprovasaun roteiru sai hanesan rezultadu importante husi prosesu naruk ne’ebé envolve diskusaun téknika, lideransa institusionál, no apoiu tékniku husi parseiru internasionál sira, inklui World Bank. Aleinde ne’e, sublinha mos importánsia atu integra esforsu husi entidade kompetente sira hodi asegura implementasaun ne’ebé koerente no sustentavel.
Enkontru ne’e konsidera hanesan plataforma importante atu fasilita diskusaun detallu no troka hanoin entre parte sira, hodi identifika no solusiona obstákulu no bareira sira ne’ebé mosu iha prosesu implementasaun. Iha tempu hanesan, partisipante sira reafirma komitmentu atu kontinua hametin koordenasaun téknika no aselera implementasaun roteiru ne’e ho maneira apropriadu, efisiente no orientadu ba rezultadu konkretu.