Baucau: Kinta, 12 Fevereiru 2026
IX Governu Konstituisionál, liuhusi Ministeriu Komérsiu no Indústria (MCI), ofisialmente lansa fatuk dahuluk ba Konstrusaun Foun Merkadu Munisipál Baucau ho konseitu modernizasaun.
Serimónia hatur fatuk dahuluk realiza husi Sua Exelénsia Vise-Primeiru Ministru, Ministru Koordenadór ba Asuntus Sosiais no Ministru Dezenvolvimentu Rural no Abitasaun Komunitária, Mariano Assanami Sabino, hamutuk ho Sua Exelénsia Ministru Komérsiu no Indústria (MCI), Nino Pereira, no akompaña husi Exelénsia Prezidente Autoridade Munisipál Baucau, Veneranda E. M. Lemos Martins.
S.E. Ministru Planeamentu no Investimentu Estratéjiku (MPIE), Eng. Gastão Francisco de Sousa, partisipa mos iha serimónia lansamentu fatuk dahuluk Konstrusaun Foun Merkadu Munisipál Baucau nian, hanesan parte husi esforsu koordenasaun interministerial atu garante planeamentu no implementasaun projetu ne’e lao tuir planu estratéjiku dezenvolvimentu nasionál.
PAM Baucau: Marka Istória Foun ba Munisípiu
Iha nia diskursu, Prezidente Autoridade Munisipál Baucau hateten katak munisípiu Baucau hein tempu naruk atu iha merkadu munisipál ida ne’ebé di’ak no modernu. Loron ne’e, tuir nia, marka istória ida foun ba Baucau tanba IX Governu konsege realiza lansamentu fatuk dahuluk ba merkadu ne’e.
“IX Governu Konstituisionál realiza fila fali merkadu munisipál ida ne’ebé dignu ba negosiante sira atu hala’o sira nia negosiu no fó sustentabilidade ekonomika ba ita nia munisípiu,” hateten PAM Baucau.
Nia reafirma katak dezenvolvimentu ida ne’e la’ós de’it infraestrutura fiziku, maibé sai hanesan pilár fundamentál ba kresimentu ekonomiku nasionál. Ho naran komunidade Baucau tomak, nia agradese ba IX Governu Konstituisionál ne’ebé lidera husi Kay Rala Xanana Gusmão, ne’ebé fó atensaun ba dezenvolvimentu munisípiu sira.
Segundo nia, liuhusi projetu ida ne’e, Munisípiu Baucau bele prepara-an di’ak liután ba prosesu Dezentralizasaun Administrativa no fortalesimentu poder lokál.
Vise-Primeiru Ministru: Fó Dignidade ba Komersiante Sira
Iha fatin hanesan, Vise-Primeiru Ministru Mariano Assanami Sabino hateten katak merkadu foun ne’e sei organiza no ordena atividade komérsiu hodi kria ambiente ne’ebé seguru no apropriadu ba komersiante sira.
“Ita fó fatin ida ne’e ba inan-aman sira ho dignidade, no tur fatin ida ne’ebé di’ak no seguru hodi sira bele hala’o sira nia negosiu,” hateten Vise-PM.
Nia apela ba Autoridade Munisipál, Autoridade Komunitária no inan-aman sira atu servisu hamutuk no apoiu malu ho ativu, tanba dezenvolvimentu rain ida ne’e presiza kontinuidade no unidade atu bele la’o ba oin.
Detallu Projetu no Orsamentu
Governu selebra kontratu ba projetu konstrusaun merkadu Munisipál Baucau ho kompañia Fujian Yougtai Construction Group Co. Ltd iha Joint Venture ho Suhurama Developer Unipessoal LDA.
Total orsamentu ba projetu refere hamutuk US$ 7,139,218.43, ho durasaun implementasaun tinan rua.
Ho realizasaun projetu ida ne’e, Governu espera katak Merkadu Munisipál Baucau bele sai sentru ekonomiku ne’ebé modernu, organizado no sustentável, hodi promove kresementu ekonomia lokal no hadia kondisaun moris komersiante sira.