Manatuto, 30 Marsu 2026 — Sua Excelência Ministru Planeamentu no Investimentu Estratéjiku, Eng. Gastão Francisco de Sousa, partisipa iha seremonia lansamentu fatuk dahuluk ba projetu Parke Indústria iha Manatuto. Projetu ne’e lidera husi empreza nasionál ETO (Esperansa Timor-Oan), ne’ebé dirije husi Nilton Telmo Gusmão.
Iha okaziaun ne’e, Ministru MPIE apresia tebes inisiativa husi setor privadu nasional ne’ebé hahú investe iha área estratéjika hanesan parke indústria. Nia hatete katak investimentu ida ne’e konsidera nu’udár investimentu estratéjiku atu loke dalan ba investór sira seluk, hodi hasa’e konfiansa katak Timor-Leste mak fatin ne’ebé seguru no favorável ba investimentu.
Iha tempu hanesan, Governu atual ne’ebé lidera husi Primeiru-Ministru Kay Rala Xanana Gusmão, reafirma nia komitmentu atu kontinua aselera prosesu investimentu iha país, ho objetivu atu promove kresimentu ekonomia sustentável no kria oportunidade ba dezenvolvimentu nasional.
(REMATA)