Díli, 11–12 Marsu – Ekipa husi Unidade Planeamentu Integradu (UPI), Ministériu Planeamentu Estratéjiku (MPIE), hala’o enkontru ida ho S.E. Mariano ASSANAMI Sabino, Vise Primeiru Ministru II, Ministru Koordenador ba Asuntu Sosiais no Ministru Dezenvolvimentu Rural no Habitasaun Komunitária, iha Palácio do Governo, liu husi Ministériu Planeamentu Estratéjiku (MPIE), nu’udar instituisaun responsavel ba planeamentu estratéjiku nasional.
Iha okaziaun ne’e, ekipa UPI aprezenta Progresso monitorizasaun Implemetasaun PED 2011-2030, rezumu kuadramentu makro-ekonomia no skenáriu makro-fiskál, hanesan parte hosi preparasaun ba Planu Médiu Prazu (Medium Term Planning – MTP) 2026–2030.
Atualmente, UPI iha MPIE prepara hela dokumentu Planu Médiu Prazu 2026–2030, ne’ebé nu’udar planu estratéjiku ba períodu tinan lima atu apoiu implementasaun Plano Estratégico de Desenvolvimento Nasional (PEDN) iha nivel governu.
Planu ne’e foka liu ba dezenvolvimentu ekonomia, konsidera nesesidade urjente ba diversifikasaun ekonomia no ameasa potensial ba sustentabilidade fiskál.
Iha área ekonomia, Planu Médiu Prazu ne’e defini objetivu prinsipál tolu, mak inklui identifikasaun dezafiu estrutural sira, fornese orientasaun ba polítika públika no investimentu, no promove kreximentu ekonomiku ho kriasaun empregu.
Dokumentu ne’e mós kobre análize kona-ba problema estrutural ekonomia Timor-Leste, definisaun objetivu estratéjiku, kuadramentu polítika públika, planu setoriál sira, no dezenvolvimentu skenáriu relasiona ho kreximentu ekonomiku, despeza públika no rendimentu doméstiku.
Enkontru ne’e sai etapa importante ida iha prosesu elaborasaun Planu Médiu Prazu 2026–2030, ne’ebé sei sai baze ba planeamentu no implementasaun polítika dezenvolvimentu iha futuru.