COVALIMA, Tersa 10 Marsu 2026 – Ministru Planeamentu no Investimentu Estratéjiku (MPIE), Eng. Gastão Francisco de Sousa, ho Ministru Administrasaun Estatal, Tomás do Rosário Cabral, hamutuk ho membru Governu balun, akompaña Sua Exelénsia Primeiru-Ministru (PM), Kay Rala Xanana Gusmão, simu proposta konstrusaun kapela ne’ebé entrega direta hosi Xefe Suku Berkasa, Postu Administrativu Zumalai, Munisípiu Covalima.
Proposta ne’e entrega hosi Xefe Suku Berkasa, Leonito Gusmão, bainhira Primeiru-Ministru Xanana Gusmão ho nia komitiva hala’o viajen hosi Munisípiu Ainaro atu ba partisipa atividade “Haree Besik Servisu Munisipál hosi Rezultadu Avaliasaun Kondisaun Mínima”, ne’ebé sei realiza iha Munisípiu Covalima iha loron Kuarta, 11 Marsu 2026.
Entrega proposta ne’e reflete aspirasaun komunidade lokal atu hetan apoiu Governu ba dezenvolvimentu infraestrutura relijioza, ne’ebé importante ba atividade espiritual no sosial iha komunidade.
Iha vizita ne’e, Primeiru-Ministru mós akompaña hosi membru Governu sira seluk, inklui Ministra Saúde (MS), Elia dos Reis Amaral; Ministru Agrikultura, Pekuária, Peskas no Floretas (MAPPF), Marcos da Cruz; Ministra Edukasaun (ME), Dulce de Jesus Soares; Ministru Asuntu Kombatente Libertasaun Nasionál; Sekretáriu Estadu Komunikasaun Sosiál (SEKOMS), Expedito Dias Ximenes; no mos Prezidente Autoridade Munisípiu Ainaro, Manuela Carmo Bucar Corte-Real.
Vizita ne’e hanesan parte hosi agenda servisu Primeiru-Ministru atu halo kontaktu direta ho lideransa lokal no rona aspirasaun komunidade sira iha munisípiu sira.