COVALIMA, Tersa 10 Marsu 2026 – Ministru Planeamentu no Investimentu Estratéjiku (MPIE), Eng. Gastão Francisco de Sousa, ho Ministru Administrasaun Estatal, Tomás do Rosário Cabral, hamutuk ho membru Governu balun, akompaña Sua Exelénsia Primeiru-Ministru, Kay Rala Xanana Gusmão, hodi halo observasaun direta ba kondisaun irrigasaun Kay Rala Xanana Gusmão iha Oebaba, Postu Administrativu Zumalai, Munisípiu Covalima.
Vizita observasaun ne’e realiza durante viajen Primeiru-Ministru ba Munisípiu Covalima atu partisipa iha atividade “Haree Besik Servisu Munisipál hosi Rezultadu Avaliasaun Kondisaun Mínima”, ne’ebé sei realiza iha loron Kuarta, 11 Marsu 2026.
Irrigasaun Zumalai rasik inaugura ona iha loron 14 Janeiru 2016 hosi Primeiru-Ministru VI Governu Konstitusionál, Rui Maria de Araújo, ho objetivu atu reforsa sistema irrigasaun no aumenta produsaun agríkola iha área ne’e.
Iha vizita ne’e, Primeiru-Ministru mós akompaña hosi membru Governu seluk, inklui Ministra Saúde (MS), Elia dos Reis Amaral; Ministru Agrikultura, Pekuária, Peskas no Floretas (MAPPF), Marcos da Cruz; Ministra Edukasaun, Dulce de Jesus Soares; Ministru Asuntu Kombatente Libertasaun Nasionál; no Sekretáriu Estadu Komunikasaun Sosiál (SEKOMS), Expedito Dias Ximenes.
Vizita ne’e hanesan parte hosi esforsu Governu atu haree diretamente implementasaun infraestrutura importante sira, liuliu sistema irrigasaun, ne’ebé iha papel importante atu suporta dezenvolvimentu setór agrikultura no melhora moris komunidade iha munisípiu Covalima.