Ainaro, 26 Fevereiru 2026
Sua Exelénsia Ministru Planeamentu no Investimentu Estratéjiku (MPIE), Eng. Gastão Francisco de Sousa, hamutuk ho Sekretáriu Estadu Dezenvolvimentu Lokál (SEDL), Mateus W. dos Santos Tallo, ne’ebé reprezenta MAE, no mos Sua Exelénsia Ministru Petroleum no Rekursu Minerais (MPRM), Francisco Monteiro, Sekretáriu Estadu Terras no Propriedades (SETP), Jaime Xaver Lopes, no Prezidente Autoridade Munisípiu Ainaro, Manuela Georgina Carmo Bucar, hala’o sosializasaun kona-ba progresu identifikasaun rai no propriedade (ai-horis) no realiniamentu iha koredór projetu Auto Estrada Zumalai–Natarbora ba komunidade afetadu sira.
Atividade ne’e realiza iha Salaun Igreja Hatu-Udo, Postu Administrativu Hat-Udo, Munisípiu Ainaro, ho partisipasaun komunidade lokal sira ne’ebé sei afetadu husi projetu infraestrutura estratéjiku ida ne’e.
Ajustamentu Tékniku no Sósiu-Ekonómiku
Antes ne’e, Governu planeia konstrui koredór Auto Estrada ho luan metru 200 no distánsia liu kilometru 76. Maibé, hafoin halo análize detalhadu ba dadus identifikasaun husi fulan Jullu to’o Outubru tinan 2025, Governu identifika nesesidade atu halo ajustamentu tékniku no konsiderasaun sósiu-ekonómika.
Tanba ne’e, deside atu reduz koredór husi metru 200 ba metru 100 no halo realiniamentu iha pontu neen (6) ne’ebé inklui área Hatu-Udo, Betanu, Wedauberek, Uma Berloik no Natarbora.
Realiniamentu ida ne’e halo ho objetivu atu evita prejuízu maka’as ba fasilidade públika no propriedade komunidade nian, hanesan torre eletrisidade, eskola, kliníka, igreja no uma komunidade sira.
Komitmentu Governu ba Transparénsia
Iha nia intervensaun, Ministru sira enfatiza katak prosesu sosializasaun importante tebes atu fó informasaun klaru ba komunidade, hodi garante transparénsia no partisipasaun ativa husi povu iha implementasaun projetu.
Projetu Auto Estrada Zumalai–Natarbora konsidera hanesan infraestrutura estratéjika ida ne’ebé sei fasilita mobilidade, liga munisípiu sira no promove dezenvolvimentu ekonomia iha rejiaun sul no leste Timor-Leste.
Ekipa Interministerial
Ekipa interministerial ne’ebé partisipa iha sosializasaun ne’e kompostu husi:
-
MPRM – TIMOR GAP E.P
-
MPIE
-
MOP
-
MJ – SETP
-
MJDAC – SEAK
-
MAFP
-
MAE
-
MACLN
-
MI – PNTL
Ho sosializasaun ida ne’e, Governu reafirma nia komitmentu atu implementa projetu infraestrutura ho konsiderasaun ba interese komunidade no minimiza impaktu negativu ba sosiedade no ambiente.