Koordenadora Unidade Planeamentu Integradu (UPI), Sra. Epi Orleães, ne’ebé mos hanesan pontu fokal ba Assuntu ASEAN husi Ministériu Planeamentu Investimentu Estratéjiku (MPIE), lidera ekipa tekniku profisionál hodi partisipa iha Reuniaun Konsultasaun Rejionál Dahuluk ho Órganu Setorál ASEAN Socio-Cultural Community (ASCC) kona-ba ASCC Results Framework.
Reuniaun ida ne’e hala’o durante loron rua, iha data 27–28 Janeiru 2026, iha Pasay City, Filipina, ho modalidade partisipasaun direta (in-person) no mos partisipasaun virutál. Ekipa UPI–MPIE partisipa liu husi modalidade virutál, liu husi Zoom Meeting iha Salaun ADN, I.P Meeting Room, Fatuhada, Dili.
Objetivu prinsipal husi Reuniaun Konsultasaun Rejionál dahuluk ida ne’e mak atu:
-
Finaliza indikadór dezempeñu prinsipál sira;
-
Hadi’a no hametin definisaun no formulasaun operasionál indikadór sira;
-
Determina nível indikadór (rejionál ka nasionál) no dadus dezagregasaun, inklui seksu, grupu idade, no kategoria seluk;
-
Diskute arranju institusionál no timeline ba rekolla dadus baseline no dezenvolvimentu relatóriu baseline.
ASEAN Socio-Cultural Community (ASCC) mak pilar tolu iha ASEAN, ne’ebé foka liu ba:
-
Moris di’ak no dignidade povu nian;
-
Edukasaun, saúde, kultura, no juventude;
-
Igualdade jéneru no inkluzaun sosiál;
-
Proteksaun sosiál, dezenvolvimentu umanu, no komunitáriu ne’ebé reziliente.