S.E. Ministru Planeamentu no Investimentu Estratéjiku (MPIE), Gastão Fransisco de Sousa, akompaña S.E. Primeiru-Ministru Repúblika Demokrátika Timor-Leste, Kay Rala Xanana Gusmão, hodi hala’o vizita ba Asosiasaun Easy Learning English (ELE), ne’ebé lokaliza iha Postu Administrativu Oecusse, Suku Lifau, Sub-Rejiaun Pante Makasar, Rejiaun Administrativa Espesiál Oecusse Ambeno (RAEOA), kuarta-feira (21/01/2026).
Asosiasaun Easy Learning English (ELE) harii ho objetivu atu oferese kapasitasaun ba foin-sa’e Oecusse-oan sira iha lian Inglés, hodi prepara rekursu umanu Timor-Leste nian atu hasoru dezenvolvimentu iha futuru.
Iha okaziaun ne’e, Primeiru-Ministru Kay Rala Xanana Gusmão enkoraja foin-sa’e sira atu kontinua aprende no hadomi edukasaun, tanba dezenvolvimentu nasaun presiza rekursu umanu sira ne’ebé iha kualidade no kapasidade.
Primeiru-Ministru mós fahe kamizola ho liafuan “𝐇𝐚𝐮 𝐍𝐢𝐚 𝐓𝐚𝐬𝐢, 𝐇𝐚𝐮 𝐍𝐚 𝐓𝐢𝐦𝐨𝐫” ba foin-sa’e sira ne’ebé daudaun tuir programa aprendizajen lian Inglés iha asosiasaun ne’e, hanesan sinal apresiamentu no motivasaun ba sira nia esforsu.
Vizita ne’e mos akompaña husi S.E. Ministru Administrasaun Estatál (MAE), Tomás do Rosário Cabral, no Prezidente Autoridade Rejiaun Administrativa Espesiál Oecusse Ambeno (RAEOA), Régio da Crúz Salu.