RAEOA, Domingo, 18 Janeiru 2026
S.E. Primeiru-Ministru Republik Demokratika Timor-Leste, Kay Rala Xanana Gusmão, hanesan Entidade Tutelár no Superintendente Órgaun Ezekutivu Rejiaun Administrativa Espesiál Oecusse Ambeno (RAEOA), hala’o vizita traballu da-huluk ba RAEOA iha tinan 2026. Vizita ne’e akompaña hosi S.E. Ministru Planeamentu no Investimentu Estratéjiku, Eng. Gastão Francisco de Sousa.
Autoridade RAEOA hamutuk ho populasaun lokal simu S.E. Primeiru-Ministru iha fronteira Sakato, Suku Nipani, Sub-Rejiaun Pante Makasar, ho dadolin tradisionál Atoni nian “Takanab” no tebetetebe hanesan forma bem-vindo.
Hafoin serimónia bem-vindo, Xefe Governu ho delegasaun kontinua vizita bá Gabinete Autoridade RAEOA iha Oebau, hodi hala’o enkontru alargada hamutuk ho Autoridade RAEOA. Enkontru ne’e diskute programa no prioridade sira ne’ebé sei hala’o durante estadia iha rejiaun ne’e, hahú hosi loron 18 to’o 22 Janeiru 2026.
Iha vizita traballu ne’e, S.E. Primeiru-Ministru akompaña hosi S.E. Ministra Finansas, Santina José Rodrigues F. Viegas Cardoso; S.E. Ministru Administrasaun Estatál, Tomás do Rosário Cabral; S.E. Ministru Planeamentu no Investimentu Estratéjiku, Eng. Gastão Francisco de Sousa; no Prezidente Komisaun Funsaun Públika (KFP), Agostinho Letêncio de Deus.